Tŭ do, tus mờ ală xã tàm tiah ngài xã: Dà Sar, Dà Nhim, kơnhoàl Lạc Dương, càr Lâm Đồng neh gŏ geh ală suơn tam tờm Atiso hòn gơs niam tàm ală chàr bơnơm bơh làng bol jơi bơtiàn ờ gal cau dê. Ală hìu làng bol kis tàm do lik klàs mờ rơƀah bơh broă tam tờm chi lơh sơnơm dê. Lŏ Liêng Jrang K’Sáu, kis tàm thôn 6, xã Dà Sar, kơnhoàl Lạc Dương pà git, lài do mìng mờng mờ broă tam kơphe mờ ală bơta biăp phan tam ờ jŏ tơngai, hìu nhă lŏ neh tus bal Mpồl tam lơh Atiso mờ neh tam gơl rơlao 3 sào ù suơn nàng tam tơrlòng. Geh broă dong kờl jơh bè sơntìl geh bơta niam, phơng sih bal mờ bơta chài tam phan, tơnơ̆ mờ 4 nhai bơh tŭ tam, lŏ neh geh rơlao 10 tơlăk đong. Lŏ Liêng Jrang K’ Sáu pà git: “Broă tam mờ ngui phơng vi sinh, phơng kơnrồ, ờ ngui phơng ka tàm broă tam tờm atiso. Phan tam do geh tơnhào nha, ai nha lơh nàng lơh phan hùc dà mờ lơh sơnơm den tàng ờ ngui sơnơm. Kông ty cih măt khà sơnơm là pal geh lơh jăt bal”.

Tơngai do, geh uă làng bol jơi bơtiàn ờ gal cau kis tàm xã: Dà Sar, xã Dà Nhim, kơnhoàl Lạc Dương, càr Lâm Đồng neh lik klàs mờ rơƀah tài kơnờm bơh broă tam tờm atiso, pơgồp bal tơn mờ mpồl lơh sa kă bro. Làng bol lơh jăt broă tam gơl bă ù tam kơphe neh kra, kòp gơtờp tus mờ broă tam tờm atiso. Tơnơ̆ mờ 4 nhai, tờm atiso geh ai tơnhào nha mờ geh kông ty blơi jơh. Pah poh, mpồl cau lơh broă bơh mpồl lơh sa kă bro ndrờm tus tàm suơn nàng bal mờ làng bol sền phan tam, bơto sồr bè bơta chài sơnka sền gàr. Mờ làng bol geh dong kờl phơng sih, bơta chài sơnka sền gàr mờ tơnhào. Tus tŭ do, gùt kơnhoàl Lạc Dương neh bơtàu tơnguh 3 mpồl pơgồp bal lơh pơgồp bal mờ tăc mìng phan geh lơh sơnơm atiso. Ồng Sử Thanh Hoài, Ƀí thư Huyện ủy kơnhoàl Lạc Dương pà git, ală broă lơh tàm ù tiah kơnhoàl ndrờm wèt tus broă làng bol tus bal lơh, pơgồp bal tơn mờ mpồl lơh sa kă bro blơi phan geh lơh: “Tŭ do he sền tàm pơgăp 1 sào ù tàm 1 nam, ờ kờp priă tă mơya làng bol kung gam geh priă cồng bơh 25 tus 30 tơlăk đong. Do là bơta phan tam gơdờp ngan mờ bơta trồ tiah, ù tiah, broă tam phan bơh làng bol tŭ do, bol añ gam cri bơyai nàng geh lơh uă rơlao. Gơtùi đơs bè hơ̆ den geh bơsong uă ngan broă bơh làng bol dê. Mpồl lơh sa kă bro atbồ broă lơh mờ blơi phan geh lơh. Hơ̆ kung là dùl gùng dà broă lơh mờ kơnhoàl Lạc Dương neh pơyoa tus nàng gàr niam rài kis ai làng bol bal mờ cau ngui sa in”.

Bal mờ broă ngui broă tam jăt broă lơh di pal den broă pơgồp bal lơh sa ngai sơlơ geh pờ ơnàng nàng gàr kơl jăp broă tăc phan ai cau tam kung bè bơta niam broă lơh ai mpồl lơh sa kă bro in lơh kung kwơ màng ngan. Ồng Hoàng Sỹ Bích, Kwang atbồ Sở Nông nghiệp mờ Phát triển Nông thôn càr Lâm Đồng pà git, broă lơh tờm bơh tŭ do tus nam 2030 là tơrgùm lơh mờ tăc ai phan atiso đơs is mờ ală bơta phan lơh sơnơm geh bơta pràn tàm tiah do đơs bal. Tơrgùm ngui kông nghệ gơguh jăk, lơh pa tàm broă kơlôi sơnơng rơwah geh sơntìl mờ bơta chài tam, sơnka sền gàr nàng geh cồng nha, bơta niam uă tàm broă lơh, lơh gơs phan nàng ai geh ală phan lơh sơnơm geh bơta pràn tàm pơrlòng tàm drà kă bro. Mờ lơh pràn broă ngui kông nghệ thông tin tàm broă atbồ, đơng lam bơh broă tam tus broă lơh, lơh gơs phan, ngui mờ tăc phan lơh sơnơm, gàr geh ală jơnau kờñ, broă ai lơh bơh dà lơgar, dunia dê tàm drà kă bro tàm lơgar mờ tăc mờ lơgar bơdìh: “Bơdìh mờ jơnau kờñ yal do, hơ̆ sồng atbồ, ngui den broă lơh jăt broă atbồ, sền gròi bơta niam phan geh lơh kung geh sền gròi ngan. Den tàng bol añ kung geh dùl broă rơndăp lơh bơh gah lơh sa suơn sre mờ bơtàu tơnguh ƀòn lơgar nàng lơh broă atbồ, sền gròi bơta niam phan geh lơh bơh suơn sre tàm broă lơh, bơtàu tơnguh mờ sền gàr khà măt phan kă bro”.

Mùl màl tàm tàm uă tiah pà gŏ, bơta kwơ lơh sa cèng geh wơl bơh broă tam tờm chi lơh sơnơm uă rơlao ngan pơn drờm mờ tam ală bơta phan tam lơh gơs phan sa ndai. Tàm uă xã, tờm chi lơh sơnơm atiso ờ mìng neh gơs tờm tơn jơh jơgloh, tơmù rơƀah mờ gam dong kờl uă hìu tàm càr Lâm Đồng geh priă uă, brồ guh lơh pas.