Drim ngai 16/5, tàm càr Quảng Bình, Đoàn Ơruh pơnu Kộng sản Hồ Chí Minh dà lơgar mờ Mpồl ơruh pơnu lam lài lài do Việt Nam mut lơh Ràng tơlik rùp, sră nggal kah yau mờ tơngume “Pơn yờ să Trường Sơn”. Tus bal dơ̆ ràng tơlik geh gal ngan cau ling yau, ơruh pơnu lam lài lài do, kwang bàng Đoàn ơruh pơnu ală càr Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Dăk Lăk, Gia Lai, Kon Tum, Dăk Nông mờ Bình Phước. Dơ̆ bơyai lơh ràng tơlik 200 pang rùp, sră nggal sềr mờ rùp ai gŏ wơl niam ngan, song dơpă ngan dơ̆ tam lơh cui rơcai tàm gùng ồs Trường Sơn; yal tơnggit cồng nha bơh mpồl ơruh pơnu lam lài lài do dê tàm rài pa.

Tàm càr Gia Lai, drim òr, Mpồl bơhiàn ờs mờng Cau ling Trường Sơn ƀòn dờng Pleiku, càr Gia Lai bơyai lơh tơnkah 65 nam ngai bơhiàn Cau ling Trường Sơn. Tàm dơ̆ tìp măt, ală kwang bàng neh yal wơl bơhiàn khin cha jăk chài bơh Cau ling trường Sơn dê. Gùng Trường Sơn-gùng Hồ Chí Minh geh kwơ màng ngan tàm broă dong kờl phan bơh tàm ală tiah dờng tus tàm tiah tam lơh dờng tàm rài tam lơh mờ ling lơgar Mỹ sò tơm tơnklàs dà lơgar, tơnklàs đah jum dà lơgar tơrgùm bal. Tŭ do, gùng Hồ Chí Minh là dùl tàm ală gơl gùng lòt tờm ngan lòt gan 28 càr, ƀòn dờng, tàm hơ̆ geh ƀòn dờng Pleiku, càr Gia Lai, pơgồp bal tàm broă bơtàu tơnguh lơh sa mpồl bơtiàn càr dê. Mpồl bơhiàn ờs mờng Cau ling Trường Sơn ƀòn dờng Pleiku tŭ do geh 87 nă cau, geh uă ngan là cau ling sồt să, cau gơtìp sơnơm khih tàm rài tam lơh, lơh aniai. Bŭ lah geh uă cau ndrờm neh dờng sơnam, bơta pràn să jan ờ geh tai, mơya ală cau ling Wa Hồ gam tus bal lơh broă sa, bơtàu tơnguh lơh sa hìu nhă tờm.