Do là nam bơsram geh tềl kuơmàng ngan tŭ Broă lơh bơto bơsram pe kâp pa, lam lơh ndrờm bal bơh ơdŭ 1 tus ơdŭ 12. Di dơ̆ mut nam bơsram pa 2024 – 2025, Tổng Ƀí thư, Củ tịc lơgar ồng Tô Lâm neh geh sră pơyua Gah bơto bơsram.

Tàm sră pơyua geh gơl cih: Di dơ̆ mut nam bơsram pa 2024 – 2025, añ jơh nùs pơyua tus ală pơgru, kwang bàng atbồ, cau lơh broă neh mờ gam lơh broă tàm Gah Bơto bơsram bal mờ ală kơnòm bơsram, cau bơsram dờng mờ ală mè bèp ală nùs nhơm đềt mềr mờ ală jơnau nting bơr niam ngan rlau jơh. Mờ nùs nhơm nam bơsram pa dê, añ pin dờn ală kơnòm bơsram, cau bơsram dờng rơp lơh ngan bơsram sră, pơlam tàp, cih dờp mờ lơh tờm jơnau git wă, lơh gơs ală pràn jak tờm, lơh gơs ală bơta kơp kờñ dờng màng nàng bơt bơtàu dà lơgar ngai sơlơ bơtàu tơnguh, gơboh gơbài. Nting bơr ală pơgru, kwang bàng atbồ, cau lơh broă Gah Bơto bơsram mờ ală kơnòm bơsram, cau bơsram dờng sùm pràn kơldang, gơboh gơbài, lơh geh uă cồng nha rlau tai tàm nam bơsram pa.