Tus tŭ do jơh gùt lơgar gam pơgăp rlau 315 rơbồ hìu bơnhă geh kal ke bè hìu ơm kờñ geh dong kờl nàng lơh niam wơl hìu ơm gàr niam lơngăp lơngai, kơ̆ kơl jăp nàng “lơngăp lơngai ơm kis mờ lơh broă sa” pơgồp bơnah lơh jat broă lơh dong kờl gơwèt mờ cau geh màng mờ Dà lơgar, lơh sir broă lơh tơrmù rƀah kơ̆ kơl jăp, gàr niam lơngăp lơngai rài kis mpồl bơtiàn.

Đơs sồr lơh tàm pơrjum, Thủ tướng ồng Phạm Minh Chính sồr ală kwang bàng Mpồl Sồr lơh tàm bơyai, cribơyai, tam pà bal mờ nùs nhơm song dơ pă, geh kơnòl, tơrgùm tàm bàr pe tơngume tờm là sền gĭt loh jơnau kờñ, nùs nhơm, pơlam gùng dà sồr lơh nàng lơh jat kràñ cê jơh nùs, geh cồng nha broă lơh, gàr niam lơh sir tàm nam 2025. Mblàng, sền gĭt ngan ngồn ală kal ke, kòl yan mờ broă lơh bơsong mờ kơnòl broă, broă bơsong tờm, broă rơndăp lơh, tơngai lơh jat nàng lơh sir jơnau kờñ tàm nam 2025.