Thủ tướng Cíñ phủ ồng Phạm Minh Chính sồr gah Bơto bơtê mờ Bơsram, ală Ƀộ, gah lơh broă Dà lơgar mờ ală tiah tơrgùm lơh jăt 09 kơnòl broă tờm, geh: Tơrgùm lam lơh jăt Jơnau đơs pơndŭt sồ 91 bơh Ƀộ Cíñ trị dê bè pơn jăt tai lơh jăt Jơnau lơh nền tàm pơrjum Tam gơl pa, tơngguh uă jơnau lơh gơtùi, geh cồng nha broă lơh ătbồ dà lơgar tàm broă lơh Bơto bơtê; Tơngguh uă cồng nha mpồl cau pơgru mờ pơgru bơto cao đẳng, đại họk; Kơlôi sơnơng, sền swì tơl làm bè tam gơl pa broă lơh bơto bơsram, sră bơto bơsram pa; Ƀộ Bơto bơtê mờ Bơsram mờ ală tiah rơcăng broă rơndăp lơh bơyai lơh dơ̆ pơrlòng jơh bơsram kâp pe nam 2025 jăt Broă lơh bơto bơtê pe kâp pa.

Lài mờ nam bơsram pa 2024- 2025, nting bơr gờm chờ jơh ală mpồl kwang bàng ătbồ, cau pơgru sùm lơh jăt niam nùs nhơm geh kơnòl mờ jơh nùs jơh tồr mờ broă lơh, sơrlèt tơl ală kal ke, sơrlèt tơl ală bơta lòng, kơ̆ dơn jơnau kờñ tam gơl pa jơh, tơl làm bơto bơtê mờ bơsram, lơh geh bơta kơ̆p kờñ sùm bơh Đảng, Dà lơgar mờ Làng bol dê, ai jơi bơtiàn Việt Nam gơgơs dồ jơi bơtiàn ngac ngar, bè Củ tịc Hồ Chí Minh ki ngàm kờñ gơboh kơ̆p kờñ sùm. Nting bơr kơ̆p kờñ nam bơsram pa 2024- 2025 lơh geh cồng nha niam bơnĕ; ală pơgru sùm pràn kơldang, gơboh gơbài chờ hờp chờ hờn, tă pơgồp uă rlau tai ai broă lơh “bơto kòn bơnus”; kơnòm bơsram, cau bơsram dờng sùm là kòn dòn bơr, kơnòm bơsram jak, lơh jăt gơtùi jơnau kơ̆p kờñ dờng, dềt tă pơgồp bơ̆t bơtàu ƀòn lơgar, dà lơgar ngai sơlơ pas sơm niam bơnĕ.