Plai sầu riêng mờ plai sầu riêng. Ală ngai lồi nhai 08 tàm ƀòn Jung 2 kung bè uă ƀòn ndai tàm xã Ea Yông, kơnhoàl Krông Păc, ală bơta ndrờm geh gŏ rùp rài bơh plai sầu riêng dê, tŭ lơh chờ gơ̆ 2 bơh gah phan neh geh mŭt klơh mờ kàl tơnhào gam mŭt tàm tơngai uă ngan.

Là ƀòn kòn cau Rơđê sơnrờp ngan tàm càr Dăk Lăk tam tờm sầu riêng piang rơmĭt gar nsiăp tàm bă ù dờng ơnàng, tus bal bơ̆t bơtàu bơnàng nàng càr Dăk Lăk gơs càr geh gah sầu riêng dờng ngan gùt lơgar dê, tŭ do làng bol kis tàm ƀòn Jung 2 kung gơs cau tờm bơh lơh chờ dê. Dà kơl hề gam gơlik mờ broă rơwah plai sầu riêng, bi Y Rô Ma Niê yal, bŭ lah kàl tơnhào ờ ru ngan, mơya bi sùm ai tơngai tus bal nàng rơcang lơh chờ. Bi Y Rô Ma Niê pà git: “Gam rơcang ai ngai lơh chờ in. Tàm ală ngai do añ lòt cih jơnau hờ bơdìh gùng uă ngan, nàng rơcang lơh chờ sầu riêng”.

Rơlao 20 nam tus bal bơtàu tơnguh sầu riêng, làng bol kis tàm ƀòn Jung 2 tŭ do ờ mìng là cau tờm bơh ală hìu kwơ̆, rơndeh ôtô, ală bă suơn tờm sầu riêng priă tơmàn mờ gam là ală dơ̆ cơn đoà jơng tàm broă kă bro phan plai sầu riêng. Ală hìu nhă tus bal tam tờm sầu riêng bơh bồ ală nam 2000, tŭ do ndrờm neh gơs cau pas. Rơnàng kơnòm să rơlao, bŭ lah neh geh hìu kơl jăp, rơndeh Honda, rơndeh kông nông… geh uă ngan kung gam dờp is să tờm gơwèt hìu rơƀah.

Bè bi Y Kôt Ayun, 37 sơnam, dờp is mìng rơ̆p geh dùl bă suơn tam tờm sầu riêng dềt tàm kàl tơnhào sơnrờp ngan den tàng kung gam lơh ngan ai rơndeh pơn diang plai sầu riêng nàng geh priă. Bi Y Kôt Ayun pà git: “Plai sầu riêng añ dê nam do geh tơnhào, mơya mìng 2, 3 tạ mơ. Suơn añ dê ờ uă, mơya añ kung lơh ngan tam sơl. Añ pơn diang plai sầu riêng là 12 jơ mang, 1 jơ àng hơ̆ sồng rê. Geh tŭ den tus àng ngai tơnơ̆ tơn hơ̆ sồng rê”.

Là dùl ƀòn “tiah tờm” bơh tiah tam uă ngan sầu riêng kơnhoàl Krông Păc dê, ƀòn Jung 2 tŭ do ờ pal mìng lơh sa hìu nhă. Làng bol kis tàm ƀòn Jung 2 gam là ƀòn tờm bơh Mpồl lơh sa bal broă lơh drơng ala broă lơh sa suơn sre Ea Yông dê, mìng geh lơh bè lơh sa suơn sre kloh niam mờ plai sầu riêng kloh. Ồng Mai Đình Thọ, Phó Ƀí thư huyện ủy kơnhoàl Krông Păc lài do, Kwang atbồ Mpồl lơh sa bal pà git, Mpồl lơh sa bal broă lơh drơng ala lơh sa suơn sre kloh Ea Yông là dùl hìu tam klăc bal, geh cau kơ đơng yàng Tin lành lơh cau atbồ mpồl lơh sa, geh yàng phờk lơh cau tàm mpồl. ală cau tàm mpồl là kòn cau Rơđê, kòn cau Mnông, kòn cau Tày, Nùng tus bal cri bơyai broă lơh sa kă bro, tam pà bal bơta kwơ, bơ̆t bơtàu Mpồl lơh sa bal gơs anih pin dờn lài ngan tàm kơnhoàl dê.

Tàm suơn tờm sầu riêng geh uă plai rềp tiah tềl kah yau Suơn ndờng CaDa, gùng mŭt tàm suơn lì uă ngan bơkào ris, ồng Thọ pơnyờ să đơs, do là anih làng bol tàm mpồl lơh sa bal ai nàng wă năc di tàm Ngai sơn tờm Dà lơgar mờ tàm ală ngai lơh chờ sầu riêng. Ồng Mai Đình Thọ pà git: “Ală bơyô gŏ tŭ do bè do, mơya mờ làng bol lơh broă sa, neh sơn đờm lơh jơh dùl nhai bloh. Ală bơyô gŏ do, dùl brê bơkào tơn. Mŭt tàm dơlam do den gŏ geh dùl brê bơkào tềng gùng lòt mờ gùng ndrờm geh dă mờ bê tông nàng cau năc in lòt rê ƀuơn rơlao”.

Bol añ lik rê bơh ƀòn Jung 2 tŭ trồ neh mho, gŏ Hìu pơrjum ƀòn Jung gal ngan cau tus pơrjum, geh săp cau đơs, geh jơnau đơs lơh mpong jơh gùt ƀlàng ơnàng. Làng bol tus pơrjum pà git, do là pơrjum geh Mpồl atbồ ƀòn mờ Ci ƀộ ƀòn tơrgùm lơh. Ồng Bùi Đình Thành, Atbồ mpồl atbồ ƀòn Jung 2 pà git, tơngu me kwơ màng ngan là hòi jà bơta pràn làng bol dê nàng lơh gùng. Mờ bơta pràn geh bơh lơh sa ƀòn dê, tơngu me do neh mhar lơh geh jơnau ring bal; broă hòi jà rơndeh ôtô bơh ală hìu làng bol tus dong kờl lơh chờ sầu riêng, kung geh ƀuơn sơl. Ồng Bùi Đình Thành pà git: “Cồng nha niam ngan. Bŭ lah khà priă tă nàng lơh gùng do kas ngan, tơl hìu 1 tơlăk đng, mơya gùt làng bol ring bal 100%. Jơnau kờñ bơh bol añ dê là lơh gùng nàng làng bol ƀuơn tàm broă lòt còp ƀồc. Do là broă niam, làng bol chờ hờp ngan. Bè broă lơh chờ den làng bol geh ờ uă broă lơh đơs crih tamya, dròng cing mồng. Hìu lơi geh rơndeh ôtô den tus bal lam mpồl lòt tàm gùng”.