Bơh bồ nam tus tŭ do, broă lùp sền, sền gròi geh lơh ndrờm bal, lơh pràn, geh broă tus bal bơh ală Ƀộ: Lơh sơnơm, Broă lơh sa mờ Bơtàu tơnguh ƀòn lơgar, Kă bro phan, Kwang àng, Khoa họk mờ Kông nghệ, Anih duh broă Mặt trận Dà lơgar Việt Nam ală càr, ƀòn dờng, Mpồl Làng bol lơh broă sa, Mpồl cau ùr… tus bal broă sền gròi Kloh niam tàm phan sa ală gah lơh broă, jòi nàng git anih lơh gơs phan sa, cih jơnau yal phan ờ di mờ jơnau geh ai.

Kờp tàm 06 nhai bồ nam do, gùt gah Lơh sơnơm neh sền rơlao 232 rơbô hìu, gŏ rơlao 15 rơbô hìu tìs bè Kloh niam phan sa, neh lơh glài rơlao 3 rơbô 300 hìu tìs, tàm hơ̆ lơh glài mờ priă mờr 2 rơbô 300 hìu mờ khà priă mờr 20 tơmàn đong, gơmù di lah pơn drờm mờ tŭ do nam 2023. Bơdìh mờ broă lơh glài mờ priă gam geh ngui broă lơh glài bơtơl mờ sồr tơmù hoàc huơr, ờ ai lơh broă 16 hìu, 745 hìu pal tơ̆p pơrgŭc phan geh lơh ờ tơl kloh niam.

Ală Ƀộ, gah lơh broă neh pơgồp bal nền nòn mờ ală tiah nàng atbồ, bơsong broă di gơlan gơtìp ƀơ̆ phan sa, bơto sồr ală tiah lơh jăt broă jăt sền ală bơta di gơlan gơtìp ƀơ̆ tàm phan sa, gàr niam broă lơh kloh phan sa, rơcang sơndră mờ khih tàm phan sa, gàr kloh niam phan sa di tàm ală ngai kwơ màng. Bơta khih phan sa, gùt lơgar dờp geh 70 dơ̆ lơh mờr 3 rơbô nă cau gơtìp mờ 12 nă cau neh gơtìp chơ̆t.

Mò Phạm Khánh Phong Lan, Kwang atbồ Sở Kloh niam phan sa ƀòn dờng Hồ Chí Minh pà git: bơta khih phan sa gơtìp kal ke tàm hìu trŭ phan sa bal, jun bao, chơ̆t jê, hìu tăc phan sa. Kal ke uă ngan là gơlik drà lơh is, tăc phan ờ geh sră nggal, tàm hơ̆ uă ngan là tăc phan online. Mò Phạm Khánh Phong Lan pà git: “Bơta kal ke uă ngan, tàm hơ̆ uă ngan là tơnơ̆ mờ kòp gơtờp là bơta gơlik geh bè ală drà lơh is, bè ală tiah tăc phan ờ geh sră. Jơnau mờ tăc tàm online tăc tàm internet kung là dùl broă lơh ờ geh sră tài tàm bơta do, cau yal tơl bơta niam, mơya ờ geh bơta lơi kờñ geh gàr niam. Ƀòn dờng den kung neh lơh dùl mpồl lơh broă is ồn, is ồn là gùt dar tiah ală drà đềt, bè ờs den he kung geh sền gròi, tus sền hơ̆ sồng he ai phan sền, mơya tàm bơdìh, cau tam pà bal cèng tơlik tơl ală bơta nàng tăc, geh uă tŭ phan kung blơi bơh tàm drà hơ̆ sồng tăc tai, gŏ anih lơh broă geh gơnoar den ntoăt pồn mờ jơnau sền gròi, jăt sền uă ngan kal ke”.

Ala măt ală Ƀộ, gah lơh broă kung kơlôi rơcang ngan bè broă tơnơ̆ mờ tŭ neh sền ờ tơl mpồl cau lơh broă, ală broă lơh tơnguh lòt sền hìu tăc phan dềt di mơ, phan sa jăt gah gùng gam lơh gơguh kơnòl tus mờ anih lơh broă ƀòn lơgar. Tàm hơ̆ uă ngan, ală bơta phan bè dà toh, ơlăk, bièr kal ke ngan sền gròi, lơh gơrềng tus mờ gơnoar bal mờ bơta kwơ di mờ adăt boh lam bơh hìu lơh mờ cau ngui sa dê. Bơdìh hơ̆ tai, ală cau ala măt kơlôi rơcang tàm bơta lơh geh gời gơnoar phan sa, tìs tàm jơnau yal, ngui bơta ờ di pal tàm jơnau yal. Ala măt Ƀộ Yal tơngit mờ Mblàng jơnau đơs là pal kơrian broă yal gan nhàr lơgar, kơrian nền nòn anih geh ai, lơh glài nền nòn cau tờm lơh, lơh pràn broă lơh glài uă. Geh jơnau sồr ờ ai ală anih kă bro phan điện tử livestream tăc phan sa tơn pràn… Jăt Thiếu tướng Nhữ Thị Minh Nguyệt, Phó Kwang atbồ Đah Kảñ sát rơcang tam dră mờ cau tìs bè tiah kis gơwèt Ƀộ Kwang àng yal, bơta kă bro phan sa ờ git loh anih lơh gơs, prăp gàr phan sa ờ tơl kloh niam, tăc loh làng ală phan sa ờ git anih lơh gơs, ờ tơl kloh tàm phan sa gơlik geh uă. Ală broă lơh sơgràm phan sa ờ git loh anih lơh gơs, jùt tơngai ai ngui… broă kă bro phan tàm online lơh gơlik geh uă kal ke tàm broă sền gròi, bơsong. Thiếu tướng Nhữ Thị Minh Nguyệt geh jơnau đơs: “Bol añ kung dan mờ Cíñ phủ gờñ tam gơl niam broă atbồ dà lơgar bè kloh niam phan sa jăt gùng dà broă lơh ring bal dùl anih bơh Dà lơgar tus tàm ală tiah, nàng gàr niam bơta lơh loh kơnòl atbồ bơh tơl gah broă, tơl kấp mờ tàm hơ̆ uă ngan là ai tơngŏ kơnòl mùl màl tàm broă atbồ ờ uă broă lơh sa kă bro phan sa gam gơlik geh uă bơta tìs mờ di gơlan lơh gơtìp ờ kloh phan sa bè tŭ do. Hơ̆ là lơh sa kă bro dềt, tăc phan sa jăt gah gùng lòt mờ trŭ ơlăk bơh broă lơh bè ờs, pa do gơlik geh ală dơ̆ khih phan sa, lơh gơtìp chơ̆t cau tài ơlăk trŭ bè ờs”.

Tàm dơ̆ pơrjum, Phó Thủ tướng ồng Lê Thành Long đơs, broă sền gròi kloh niam phan sa neh geh uă broă lơh ngan mờ neh lơh geh ală cồng nha ngan ngồn. Ală broă lơh geh ai gam lơh di mờ gùng dà geh ai mờ ngui geh bơta gơdờp bal. Mơya kung gam uă bơta ờ pràn, bơta kal ke, geh gŏ ngan là bơta di gơlan gơtìp ờ kloh phan sa tŭ do geh gŏ ngan, bơta khih phan sa, khà cau tìs gơguh, broă lơh glài ờ hềt tơl pràn nàng kơrian. Phó Thủ tướng ồng Lê Thành Long sồr: “Añ gŏ là pal gàr kloh niam phan sa, jơnau git wă bơh làng bol dê, lơh gơs bơta mờng mờ tàm dùl bơta lơi lơi hơ̆ sơnđan là bơta niam chài ngui sa, hơ̆, hơ̆ sồng là kơl jăp, di lah ờ ală kwang bàng geh tơnguh tai tus uă rơlao jơ̆t dơ̆ mpồl lòt sền tus tơl hìu di gơlan kung ờ geh cồng nha sơl. Lơh bè lơi nàng lơh gơs bơta mờng mờ gùng dà broă ngui sa ngăc ngar là kwơ màng ngan, geh kwơ tềng đăp măt mờ geh kwơ tàm bơta jŏ jòng. Ngan là ală Ƀộ, gah lơh broă dà lơgar tàm kơnòl broă bơh să tờm dê mờ mpồl cau lơh broă dê geh nàng tơnguh broă lòt sền ni sơna mờ tŭ gŏ den lơh glài nền nòn, mờ yal bè bơta do nàng geh nùs nhơm rơcang kơryan lài”.