Hìu ngài mờ bơtơ̆t rơbòng dà Dăk Nting di pơgăp 500 thơ̆k hờ đah jum, bi K’ Thu, kòn cau Mnông, kis tàm thôn Quảng Tiến, xã Quảng Sơn neh rơcang ai pơ-ùr mờ 02 nă kòn gam dềt rê ơm tàm hìu mò tiah tàm gùl xã nàng rơcang pleh mờ bơta gơtìp tơrlah bơtơ̆t ni sơna. Dùl nă bi K’ Thu ơm is nàng sền gàr hìu, suơn tam phan mờ sùm kơlôi rơcang.

Bi K’ Thu pà git: “Làng bol kis hờ đah jum bơtơ̆t do kơlôi rơcang ngan, trồ mìu sùm bè do di gơlan lơh bơtơ̆t gơtìp tơrlah tàm tŭ lơi mờ he ờ git lài. Dan ală kấp geh gơnoar di lah ờ lơh kơl jăp wơl tiah gơtìp tơrlah den lơh tơrlah tơn nàng làng bol bañ gơtìp kơlôi rơcang ir. Di lah bơtơ̆t do gơtìp tơrlah den ală hìu làng bol kis tàm tiah hờ đah jum gơtìp dà cò pơrdô jơh”.

Ồng Vũ Tiến Lư, Ƀí thư Huyện ủy kơnhoàl Dăk Glong, càr Dăk Nông pà git, nhai 08 nam 2023, tơnơ mờ tŭ gơtìp gơmù ù, rơdàng tềng bơtơ̆t Dăk Nting, xã Quảng Sơn, kơnhoàl Dăk Glong neh sồr ntrờn 34 hìu làng bol hờ đah jum. tơnơ̆ mờ dùl tơngai, làng bol neh rê ơm kis wơl mờ tam phan. Tŭ do, gam tàm kàl mìu, den tàng bơta di gơlan gơtìp tơrlah bơtơ̆t do là ờ git lài ngan, pal gờñ lơh nàng gàr niam màng kis bal mờ phan bơna ai làng bol in. Ồng Vũ Tiến Lư pà git: “Bơtơ̆t rơbòng dà Dăk Nting dùl nam do bloh, tơnơ̆ mờ tŭ gơmù ù den kung ờ hềt git tài bơta lơi. Den tàng geh jơnau sồr là gờñ pal sền wơl nàng git tài bơta lơi hơ̆ sồng lơh wơl broă lơh do”.

Broă lơh wơl, lơh niam broă lơh bơtơ̆t rơbòng dà Dăk Nting gơtìp gơmù ù mờ rơdàng geh sền là jal mhar. Mơya ồng Phạm Tuấn Anh, Kwang atbồ Sở Lơh broă sa mờ Bơtàu tơnguh Ƀòn lơgar càr Dăk Nông đơs là kung gam ờ git bè lơi mờ lơyài tàm broă kờñ git tài bơta lơi kung bè broă lơh niam wơl broă lơh do. Neh tờm 01 nam mơya kung gam ờ hềt git tài bơta lơi là tài broă lơh ờ kơl jăp, ha là tài ù tiah ờ niam. Jăt ồng Phạm Tuấn Anh đơs, broă bơta ală cau lơh “pleh” tus bal sền nàng git tài bơta lơi bơh broă lơh bơtơ̆t do. Ồng Phạm Tuấn Anh pà git: “Broă kal ke ngan là jòi git mpồl pơlam lơh geh tơl pràn, bơta pràn nàng lơh jăt kơnòl broă do. Tàm broă lơh, bol añ jà uă ngan mpồl lơh broă tus nàng sền, mơya ală mpồl do tus sền den hơ̆ sồng lik rê is, lơh gơbàn lơyài ngan. Hơ̆ sồng tus tàm tŭ do Anih lơh broă Jăk chài bơtơ̆t rơbòng dà dờp jơnau jà, tŭ do kung neh ring bal geh pơrgon lơh broă bal nàng lơh jăt kơnòl broă do”.

Rơndăp broă lơh tơnao dơng dà Dăk Nting geh khà priă bơcri 137 tơmàn đong bơh priă lơh jơnau kờñ tam gơl trồ tiah mờ gơguh lơh sa tơlir tơngai bơh nam 2016 tus 2020 mờ priă càn lài bơh kes priă càr dê. Rơndăp broă lơh do geh Mpồl atbồ ală rơndăp broă bơcri priă bơtơ̆t bơtàu càr Dăk Nông lơh tờm bơcri priă. Bồ nhai 08 nam 2023, broă lơh bơtơ̆t do gơtìp gơmù ù, rơdàng tềng bơtơ̆t tŭ bơ̆t bềng dà. Mpồl sồr lơh Dà lơgar bè rơcang kơrian mờ rềs àr geh Thứ trưởng Ƀộ Lơh broă sa mờ Bơtàu tơnguh Ƀòn lơgar ồng Nguyễn Hoàng Hiệp, Phó Kwang atbồ mpồl lam bồ neh tus sền tơn mờ sồr geh ală broă lơh jal mhar kung bè jŏ jòng. Anih duh broă Làng bol càr Dăk Nông kung sồr sùm mhar sền nàng git tài bơta lơi mờ lơh niam wơl bơtơ̆t do, mơya tus tŭ do kung gam ơm gời sùm.

Ồng Hồ Văn Mười, Củ tịc Anih duh broă Làng bol càr Dăk Nông đơs là, geh bơta ờ tus bal nền nòn, ờ jơh kơnòl tàm broă bơsong, lơh kơl jăp wơl bơtơ̆t rơbòng dà Dăk Nting. Ồng Hồ Văn Mười pà git: “Pơrjum geh yal mờ pang sră, đơs neh uă dơ̆ ngan mờ kung ờ lơh, di lah bơtơ̆t Dăk Nting tàm kàl do gơtìp tơrlah lơh aniai tus mờ màng kis kòn bơnus, phan bơna làng bol dê den cau lơi dờp kơnòl. Mờ rơlao 01 nam do bloh, tus tŭ do hơ̆ sồng jòi geh anih lơh broă nàng sền git, mờ sền git tàm kàl mìu do tai là gơtìp kal ke ngan”.

Dà lơgar neh mhar sồr, càr sùm hòi jà, mơya broă tus sền nàng git tài bơta lơi mờ broă lơh niam wơl bơh gơmù ù, rơdàng tềng bơtơ̆t dơng dà Dăk Nting, xã Quảng Sơn, kơnhoàl Dăk Glong, càr Dăk Nông kung gam ờ hềt geh lơh sơl. Tàm tŭ hơ̆, bơta di gơlan gơtìp tơrlah bơtơ̆t dơng dà do là ờ hềt git lài tàm kàl mìu dà tih dà cò do, màng kis bal mờ phan bơna bơh làng bol kis tàm tiah đah jum sùm gơtìp tàm bơta pơhìn sùm.