Đơs tàm dơ̆ tìp mat tơm bơh bơr, Thủ tướng ồng Phạm Minh Chính đơs sùm ală bơta ndrờm bal, rềp mềr đah 2 lơgar Việt Nam mờ Lo dê jơh bal bè bơta geh is, niam chài kah yau. Jat hơ̆, 2 lơgar geh “bơnơm tàm pơn jat bơnơm, dà dờng tàm pơn jat dà dờng” kah yau bơta gĭt gơ̆p jŏ rài, bơta lơh bơyô bal “là mpồl bal mờ kung là oh mi bal”. Is ồn, tơnơ̆ ală dơ̆ lòt còp bal mờ gơ̆p pa do bơh kwang đơng lam bồ kấp dờng 2 Đảng, 2 lơgar dê, bơta gĭt gơ̆p Lơh broă bal kwơ màng tơl làm Việt Nam mờ Lo gam geh bơnàng jă cíñ trị kơ̆ kơl jăp.

Thủ tướng đơs là, kờñ ngan sơlơ tơnguh tai lơh broă bal lơh sa, kă bro, bơcri priă uă rlau tai, pràn kơl dang rlau tai, geh cồng nha rlau tai. Việt Nam sền gĭt bơtàu tơnguh lơh sa là kơnòl broă tờm, bơt bơtàu rài lơh sa is, lơh tờm is pơgồp bal mờ rcang lài, jơh nùs mut gơrờm bal mờ ală lơgar jrô ơnàng làm uă, mut lơh broă ngan ngồn mờ geh cồng nha; sền gàr Dà lơgar, lơngăp lơngai, gàr kơ̆ kơl jăp cíñ trị, rơndăp tăp sèng lơngăp lơngai mpồl bơtiàn nàng cau bơcri priă in iang nùs lơh sa kơ̆ kơl jăp mờ jŏ jòng.