Tàm dơ̆ wă, Củ tịc lơgar ồng Lương Cường đơs niam broă bàr lơgar, bàr đảng tam pà bal bal uă bơta ndrờm bal bè nùs nhơm kơ̆p kờñ khăt gơboh, krơi is, ndrờm bal, ring bal, gơguh jăk mpồl bơtiàn tàm bơta git gơ̆p kơ̆ kơl jăp, tam pà bal bơta kwơ, geh bơta pràn nàng rề ơnàng lơh broă bal, bơtơl bal mờ dong kờl bal tàm broă bơtàu tơnguh tài bơta kwơ bơh làng bol tơl lơgar dê, tài bơta ring lơngai, lơh broă bal, bơtàu tơnguh tàm tiah do mờ tàm dunia.

Củ tịc lơgar đơs sùm, lơgar Việt Nam kơ̆p kờñ lơh broă bal mờ ală lơgar lơh bơyô bal ờs mờng tàm tiah Mỹ Latiñ, tàm hơ̆ uă ngan là mờ lơgar Chile, lơgar kwơ màng lài ngan, geh gơnoar tề lam broă tơrgùm bal tàm tiah do, pơgồp bal tiah do mờ ngai sơlơ geh gơnoar kwơ màng rơlao tàm ală bơta gùt plai ù. Củ tịc lơgar kơ̆p kờñ tàm tơngai tus, bàr Đảng pal tơnguh broă pơgồp bal nền nòn mờ lơh geh cồng nha jơnau ring bal lơh broă bal đah bàr Đảng, mờ pơn jăt tai tơnguh nùs nhơm pin dờn kấp dờng mờ tàm tơngu me git gơ̆p cíñ trị lơh tờm mờ ai geh gùng dà bơtàu tơnguh bơta git gơ̆p lơh broă bal tơl ală bơta đah bàr lơgar dê, tàm hơ̆ uă ngan là tàm ală gah broă mờ bàr lơgar geh bơta pràn.

Tàm dơ̆ tus còp, Củ tịc lơgar ồng Lương Cường neh tus còp hìu Kwang atbồ lơgar Chile lài do ồng Salvador Allende, do là dùl cau bơyô dờng Củ tịc Hồ Chí Minh bal mờ làng bol lơgar Việt Nam dê; pơdơng goàng bơkào kah kơlôi Củ tịc Hồ Chí Minh tàm lơgar Chile.