Mang ngai 12/11, tàm Hà Nội, gơm chờ tơngkah kir sơnrai 94 nam Ngai bơhiàn Mặt trận Dà lơgar Việt Nam (18/11/1930 - 18/11/2024), Tổng Ƀí thư ồng Tô Lâm neh tus bal Ngai chờ Tam klăc dờng jơh gùt jơi bơtiàn mờ uă ngan làng bol ală tiah làng bol ơm kis sơnah ƀòn Quán Thánh, quận Ba Đình dê. Tổng Ƀí thư đơs sùm, bơta pràn bơh mpồl tam klăc dờng jơh gùt jơi bơtiàn sùm là dùl tàm ală bơta pràn kwơ màng ngan rlau jơh, pràn kơl dang ngan rlau jơh nàng jơh gùt Đảng, jơh gùt làng bol, jơh gùt ling klàng he dê sơr lèt gan tơl bơta kal ke, bơta lòng, lơh tus geh broă lơh tam gơl pa, bơtàu tơnguh Dà lơgar đơs bal mờ bơt bơtàu càr lơgar ring lơngai, niam chài, pa ngan đơs is.

Đơs loh Dà lơgar he dê neh tơrgùm tơl ală bơta kờñ pal geh mờ gam ơm tềng đăp tŭ tơngai niam kah yau nàng mut tàm rài pa, rài brồ să bơh jơi bơtiàn dê, mơya nàng lơh geh bơta do, Tổng Ƀí thư đơs là, tơngai tus pal pơn jat tai bơsram lơh jat jrô ơnàng làm uă nùs nhơm “ai làng bol là tờm, cau tờm bơh tơl gùng dà broă lơh, broă dong kờl”, “ai hờn chờ, hờm ram bơh làng bol dê là jơnau kờñ pơnđơl pràn lơh ngan”, tơrgùm tă bơsong kal ke “bơta gơ kòl” nàng bơsong, hòi jà mờ ngui geh cồng nha tơl priă jền, lơh geh tŭ tơngai pa, mut lơh tơl bơta ƀuơn bơta pràn, sơlơ tơnguh tai uă ngan bơtàu tơnguh lơh sa- mpồl bơtiàn, bơtàu tơnguh rài kis phan bơna, nùs nhơm bơh làng bol dê, gàr niam tơl nă làng bol ndrờm dờp geh ală cồng nha tam gơl pa, bơtàu tơnguh, ờ gŏ lời dồ nă cau lơi gơtìp lời wơl bơh ngkờp”.