Ală cau pơrlồm măt yal bè broă dồs priă đèng, pơhìn koh đèng, sồr năc ngui đèng tơm priă đèng bơh broă pơyua priă tàm măt kes priă (tài khoản) anih priă jền; halà ai phan ngui lơh pơrlồm tơmŭt tàm điện thoại nàng kờñ sơgràm gơnoar sok sền điện thoại bơh năc ngui đèng dê, lơh pơyua bơnah priă uă. Kông ty Ồs đèng Dăk Lăk đơs ngan, tơl nă cau lơh broă ồs đèng tŭ lơh broă mờ năc ngui đèng ndrờm lơh jăt broă lơh ờs mờng sền gàr năc ngui đèng, ờ gŏ di geh nùs nhơm tràl sơbìl, ờ gĭt jơnau, ờ gŏ di bơto pơlam năc ngui đèng pờ mŭt tàm gùng pơlam (link), ờ gŏ di sồr năc ngui đèng crăp ơn phan ngui bơh điện thoại.

Ồs đèng Dăk Lăk sồr năc ngui đèng yờ tơngguh nùs nhơm rơcăng ngăc kơrhia ngan ờ gŏ di yal tơnggĭt jơnau să tờm dê, ờ tơm priă đèng tàm măt kes priă anih priă jền tŭ ờ hềt geh lùp nền, bañ crăp ơn phan ngui krơi tàm điện thoại. Tŭ dờp geh sồ điện thoại krơi hòi tus, jơnau cih pơyua pin pơrlồm măt cau lơh broă gah ồs đèng dê, năc ngui đèng pa yal mơ tơn sồ tờm 19001909 halà lùp mờ ồs đèng tiah he dê nàng geh bơto pơlam dong kờl di tŭ.