Gah Bơto bơtê sền gĭt tơngume nam 2024- 2025 là “Duh rơngòt kơrnoat boh lam geh kơnòl, tam gơl pa sùm, tơnguh uă cồng nha” mờ uă kơnòl broă tờm ngan. Nàng lam lơh jat kơnòl broă nam bơsram 2024-2025 di tŭ, geh ngan, geh cồng nha, Ƀộ Bơto bơtê mờ Bơsram sồr Anih duh broă làng bol ală càr, ƀòn dờng gơwèt dà lơgar sơlơ tơnguh sồr lơh kờp sền, lòt sền, sồr lơh ngan gàr niam tơl phan bơna bơt bơtàu, phan bơna măi mok tềng đăp mut nam bơsram pa. Mơkung geh broă lơh di tŭ nàng bơsong bơta rơndăp tăp sèng mpồl cau pơgru gam kal ke tàm ală tiah dê jat gơnăp gơnoar.

Bơt bơtàu, lam lơh jat broă lơh dong kờl ală cau là kơnòm bơsram hìu bơnhă rƀah, hìu bơnhă ndrờm rƀah, kơnòm bơsram gơwèt hìu bơnhă geh sră dong kờl dà lơgar, kơnòm bơsram geh rài kis kal ke, ờ pràn, tiah sar lơgar ngài, ù tiah kal ke, kơnòm bơsram tiah làng bol jơi bơtiàn dồ ết nă cau, geh tơl sră bơsram, phan ngui bơsram sră mờ ală bơta kwơ màng kờñ pal geh ndai; ờ gŏ di lời geh kơnòm bơsram lơi tài bơh rài kis kal ke mờ ờ geh lòt bơsram.