Mờ tơngume “Sơlơ tơnguh tai nùs nhơm lơh bơyô bal mờ tam klăc bal tài dùl mpồl bơtiàn dờng pràn is mờ pas gơs”, Pơrjum neh geh ai ală gùng dà pơlam dờng nàng kờñ ngui niam bơta ƀuơn bơta pràn bơh ală lơgar tàm mpồl dê, gơ jal ngan mờ tŭ tơngai niam bơh ală broă lơh bơtàu tơnguh pa, gơ gơs tiah tus bơcri priă gơ kờñ ngan lam lài tàm tiah do dê, mờ lơh geh bơta bơtàu tơnguh mhar ai lơh broă bal đah ală lơgar Campuchia - Lào - Myanmar - Việt Nam.

Đơs tàm pơrjum, Thủ tướng ồng Phạm Minh Chính đơs, dunia gam sền ală tam gơl jrô ơnàng làm uă, pờ geh ai 4 lơgar in tŭ tơngai niam bơtàu tơnguh ờ hềt tŭ lơi geh, tŭ tơngai niam bơh rài lơh bal mờ tam gơl pa bơceh lơh. Do ngan là tŭ tơngai kwơ màng nàng lơh geh bơtàu tơnguh mhar ai lơh broă bal đah ală lơgar tàm tiah do dê. Thủ tướng Cíñ phủ đơs nền Việt Nam sùm sền dờng màng lơh broă bal Campuchia– Lào – Myanmar– Việt Nam mờ rơ̆p pơn jat tai tă pơgồp jơh nùs jơh pràn he dê nàng lơh jrô ơnàng làm uă rlau tai bơta gĭt gơ̆p lơh bơyô bal ờs mờng, lơgar rềp bal rềp mềr, geh bơta kwơ bal, brồ guh bal tàm rài bơtàu tơnguh pa.