Lài mờ hơ̆, tàm 02 ngai bơh ngai 07 tus ngai 08 nhai 11, Mpồl đơng lam Ling sền gàr tiah nhàr lơgar càr Dăk Lăk neh sồr ală pôs ling sền gàr Tiah nhàr lơgar tàm tiah nhàr lơgar kơnhoàl Buôn Đôn pơgồp bal mờ Mpồl Đơng lam Ling klàng càr Dăk Lăk, Hìu bơsram Ling rơndeh par, gơwèt Trung đoàn Ling rơndeh par 940 bơyai ai ling, phan lơh broă nàng lòt jòi rơndeh par tàp par Yak-130 gơtìp rềs àr.

Tàm xã tiah nhàr lơgar Ea Bung, kơnhoàl Ea Súp mờ tiah Brê Dà lơgar Yok Đôn, càr Dăk Lăk pà tiah rơndeh par tàp par Yak-130 bơh Trung đoàn Ling rơndeh par 940 tơlik jơnau yal dŭt ndơl lài mờ tŭ gơtìp rềs àr. Tơnơ̆ 02 ngai lơh ngan jòi, mpồl lơh broă geh gơnoar neh gŏ tiah rơndeh par Yak-130 gơdùh rềp tềng anih sền gàr brê bơh Mpồl sền gàr brê sồ 09 Brê Dà lơgar Yok Đôn dê.