Tàm dơ̆ bơyai lơh, kwang đơng lam bồ càr Kon Tum jờng rơ gah bơto bơtê mờ bơsram bal mờ mpồl cau pơgru bơh càr dê tàm ală nam do neh lam lơh, lơh jat dùl ròt ală kơnòl broă, broă bơsong bè tam gơl bơh sơn rờp, tơl làm bơto bơtê mờ bơsram tàm càr dê.

Pơn rơ ngan là gàr sùm kơ̆ kơl jăp broă lơh bơto bơtê mầm non ai kơnòm dềt 5 sơnam, bơto bơtê kấp 1 mờ bơto bơtê kấp 2; ală srơh tàm pơrlòng bơto bơtê mờ bơsram, pơn jờng bơsram, bơsram cau jak in, bơt bơtàu mpồl bơtiàn bơsram sră geh sền gròi. Di dơ̆ do, pơgru Thái Khắc Hoà, Kwang atbồ Cơldŭ lơh broă bơto bơtê mờ bơsram ƀòn dờng Kon Tum chờ hờp ngan dờp sră jờng rơ Cau pơgru jak bơh Củ tịc lơgar dê pà. Ƀộ Bơto bơtê mờ bơsram pà sră jờng rơ 2 nă cau pơgru pơn rơ jak nam 2024 tàm càr Kon Tum; Củ tịc Anih duh broă làng bol càr Kon Tum pà Bồng bi pơrlòng nam bơsram  2023-2024 ai 16 mpồl cau in.