Tàm do, Tổng Ƀí thư bal mờ mpồl kwang bàng lơh broă neh tus chu ñàng kah kơlôi ală Cau ling khin cha jăk chài chơ̆t màng tềng Anih kah kơlôi ală cau ling chơ̆t màng, còp pà phan kwang bàng cau ling tàm Anih Rada 27 mờ đơng lam dơ̆ lơh broă mờ huyện ủy Bạch Long Vĩ.

Đơs sùm Bồt Bạch Long Vĩ geh gơnoar là tiah tờm kơl dìng, dùl tiah lam lài sền bơta lơngăp lơngai tàm dà lềng, tàm hơ̆ uă ngan là Tiah dà lềng Bạch Long Vĩ là dùl tàm 08 tiah lơh sa dờng bơh dà lềng đah Tô dà lơgar dê, bơta niam dà lềng geh uă, Tổng Ƀí thư đơs sùm, bơh bơta geh, bơta pràn bal mờ bơta kwơ bơh Bạc Long Vĩ  dê, ƀòn dờng Hải Phòng bal mờ kơnhoàl Bạch Long Vĩ pal kơlôi sơnơng bè broă rơndăp lơh ba mờ broă lơh mùl màl nàng kơnhoàl bồt do gơs tiah tờm broă lơh drơng ala dong kờl broă lơh ka, bơtàu tơnguh tiah ròng phan tàm dà mờ hòi jà năc nhơl chờ tus, bè jơnau lơh nền bơh Ƀộ Cíñ trị neh ai. Bè kơnòl broă tàm tơngai tus, Tổng Ƀí thư sồr, pal geh rơndăp ù tiah niam tiah lơh sa mờ tiah niam tàm dà lềng nàng geh gùng dà bơcri priă ndrờm bal bè phan bơna năng lượng, gùng lòt, viễn thông, broă lơh phan bơna lơh ka, tam dră mờ tam gơl trồ tiah, dà lềng gơguh tih, anih pleh mìu càl rơbut dờng, gàr niam broă pơgồp bal nền nòn bơtàu tơnguh lơh sa mpồl bơtiàn, pơgồp bal mờ tơnguh broă sền gàr dà lơgar, lơngăp lơngai.