Tàm nùs nhơm ki ngàm, ram mhŭ, Thủ tướng ồng Phạm Minh Chính chờ hờp wă rò 60 nă cau pơgru pơnrơ ngan, ală cau neh geh uă tă pơgồp jak chài ngan ai broă lơh bơto bơtê mờ bơsram bơh dà lơgar dê in, ala măt ai 1 tơlak 600 rbô nă cau pơgru tàm jơh gùt lơgar in. Thủ tướng đơs sùm, wèt tus rài pa, bơto bơtê pơn jăt tai dà broă lơh khà dùl dà lơgar dê; broă lơh bơto bơtê mờ bơsram lơgar he dê pal kràñ cê jơh nùs tam gơl pa jơh mờ tơl làm rlau tai, pal geh bơ̆t bơtàu ngan ngồn cồng nha mờ bơceh lơh.

Nàng lơh jăt niam ală kơnòl broă kơn jơ̆ kơn jŭt ngan do, Thủ tướng sồr ală ƀộ, gah broă, ală tiah pơn jăt tai sền gròi, dong kờl ai broă lơh bơto bơtê mờ bơsram in; Hòi tơrgùm mờ ngui geh cồng nha ală priă jền nàng bơcri lơh phan bơna hìu bơsram; pơn jăt tai lơh mờ bơtàu tơngguh niam chài tàm anih bơsram. Tơngguh uă bơta jak mpồl cau pơgru, kwang bàng lơh broă bơto bơtê mờ bơsram. Thủ tướng sồr, tơl nă klau pơgru, tơl nă ùr pơgru pal là krơh àng tĕ bè bơsram tàp nùs nhơm, pơlam tàp bơta jak, gơboh broă lơh, gơboh kòn bơnus, sơmbăt tê bal bơ̆t bơtàu rơnàng tơnơ̆ do bơh dà lơgar dê bơtàu tơngguh tơl làm.