Ngai 15/11, Tỉñ ủy càr Dăk Nông bơyai lơh pơrjum yal 6 Jơnau lơh nền bơh Mpồl lơh Kơnòl broă sùm Tỉñ ủy càr dê bè broă lơh kwang bàng. Jat hơ̆, Mpồl lơh kơnòl broă sùm Tỉñ ủy càr Dăk Nông lơh nền lời at gơnoar broă Kwang atbồ Mpồl Hòi jà làng bol Tỉñ ủy càr gơwèt mờ mò Hà Thị Hạnh – Kwang atbồ Mpồl Hòi jà làng bol Tỉñ ủy càr, Củ tịc Anih duh broă Mặt trận Dà lơgar Việt Nam càr, kờp bơh ngai 20/11/2024. Ồng Lê Văn Chiến, Phó Củ tịc Duh broă sùm Anih duh broă làng bol càr geh ntrờn, jàu kơnòl broă, pồ at gơnoar broă Kwang atbồ Mpồl Hòi jà làng bol Tỉñ ủy càr Dăk Nông.

Kung tàm pơrjum, Tỉñ ủy càr Dăk Nông neh yal ală Jơnau lơh nền bè broă ntrờn, sồr ồng Nguyễn Văn Thanh - Phó Kwang atbồ Mpồl hòi jà làng bol Tỉñ ủy càr mut bal tàm Mpồl Duh broă, Mpồl Lơh kơnòl broă sùm, at gơnoar broă Phó Ƀí thư Duh broă sùm Huyện ủy kơnhoàl Dăk Song, tơngai lơh broă bơh nam 2020 - 2025. Ntrờn, pồ ồng Lê Ngọc Quang, Kwang atbồ Sở Niam chài- Tàp pràn să jan mờ Lòt nhơl càr Dăk Nông at gơnoar broă Phó Kwang atbồ Mpồl mblàng yal mờ bơto bơtê Tỉñ ủy càr kờp bơh ngai 20/11/2024. Trờn, pồ ồng Phạm Đức Lộc, Phó Ƀí thư Duh broă sùm Huyện ủy kơnhoàl Dăk Song at gơnoar broă Phó Kwang atbồ Mpồl Hòi jà làng bol Tỉñ ủy càr kờp bơh ngai 20/11/2024. Jơnau lơh nền tơn jŏ tơngai at gơnoar broă Phó Kwang atbồ Mpồl Hòi jà làng bol Tỉñ ủy càr gơwèt mờ ồng Lê Sỹ Tuân kờp bơh ngai 23/10/2024 tus di tŭ tơl sơnơm ơm rlô lơh broă.