Bi Hồ Sỹ Trung ơm tàm thôn 10, xã Ea Sar, kơnhoàl Ea Kar, càr Dăk Lăk là hìu bơnhă sơn rờp ai tờm gơ àl sơntìl U Hồng bơh kơnhoàl Lục Ngạn, càr Bắc Giang mut tàm kơnhoàl Ea Kar, càr Dăk Lăk tam bơh rlau 10 nam lài. Tŭ do, bi geh mờr 10 lồ gơ àl gam tàm tơngai pik tơnhàu. Bi yal, kàl gơ àl nam do cồng nha tơnhàu gơmù pơgap bơh 30 tus 40% pơndrờm mờ kàl lài, bualh bè hơ̆, giă tac jơnhua den tàng bulah tơnhàu ờ huan uă, mơya kung gam geh priă cồng 300 tơlak đông dùl lồ: “Nam do, cồng nha tơnhàu suơn añ dê geh rlau 30 tấn plai gơ àl, gơtùi đơs nam do tơnhàu ờ huan geh, pơndrờm mờ nam lài mìng geh pơgap bơh 60 tus 70% khà lơh geh. Tài nam do trồ tiah mrềt gơtìp koh gơl, trồ tơngai duh jŏ jòng, ờ ƀuơn ai tờm gơ àl in dờng pràn den tàng tơnhàu ờ geh”.

Ồng Nguyễn Văn Bình – Kwang atbồ Hợp ták xã lơh sa suơn sre Thanh Bình kơnhoàl Ea Kar pà git, tŭ do Hợp ták xã geh 16 hìu bơnhă geh jơng, kờp jơh bă gơ àl neh pik tơnhàu 100 lồ. Khà tơnhàu pah kàl kờp dŭ geh bơh 1 rbô 400 tus 1 rbô 600 tấn. Hợp ták xã kung lơh bal blơi phan lơh gơs ai mờr 200 lồ bơh 60 hìu bơnhă làng bol tàm ală kơnhoàl Ea H’leo, Ea Kar, Krông Bông, Krông Năng… Jat ồng Bình đơs, plai gơ àl ală nam rềp ndo tac ƀuơn đau, ală drà kă bro bè Lo, Hàn Quôk halà Nhờk… ndrờm kờñ ngan plai chi Việt Nam dê, tàm hơ̆ geh plai gơ àl. Kàl gơ àl tàm Ea Kar sùm sơn đờm pik tơnhàu bơh nggùl nhai 4 pah nam, gờñ rlau mờ tơngai pik tàm kơnhoàl Lục Ngạn, càr Bắc Giang pơgap 1 nhai nggùl, do là bơta ƀuơn nàng tac hờ lơgar ndai kung bè tac tàm lơgar. Ồng Bình đơs: “Kàl gơ àl nam 2024 do gơ wèt mờ xã Ea Sar mờ Hợp ták xã Thanh Bình den ƀuon rlau tài geh uă cau blơi nàng tac tus lơgar Lo. Tŭ do, geh mờr 10 mpồl lơh sa kă bro tus tàm suơn nàng blơi gơ àl, ơn tàm container mrềt tac hờ lơgar ndai. Giă blơi tàm suơn mờr 55 rbô đông dùl kĭ”.

Kơnhoàl Ea Kar là tiah tam gơ àl uă ngan bơh càr Dăk Lăk dê. Gùt kơnhoàl geh 1 rbô 23 lồ, tàm hơ̆ bă gơ àl gam pik tơnhàu mờ 700 lồ, tơrgùm tàm ală xã Ea Sar, Ea Sô, Ea Tih, Xuân Phú, Cư Huê, Ea Đar. Sơntìl gơ àl geh tam tàm do uă ngan là U Hồng, U Thâm mờ U Trứng, geh blơi bơh ală càr Hải Dương, Bắc Giang mờ Quảng Ninh. Xã Ea Sar tŭ do geh bă ù tam gơ àl uă ngan rlau jơh kơnhoàl mờ rlau 400 lồ. Ală nam rềp ndo, cồng nha bơh tờm gơ àl cèng wơl uă ngan, cau tam rơhời ngui bơta chài măi mok tàm broă tam, sơngka sền gàr nàng tơnguh cồng nha tơnhàu, bơta niam plai gơ àl dê. Tŭ do, rlau 80% bă ù tam gơ àl tàm Ea Kar geh tam, sơngka sền gàr jat jơnau sồr VietGAP, ngui măi ƀồm dà hòr ntờc, ding ƀồm til mờ pờ is, tềm pềr dà ƀồm, rơcang sơndră niam mờ bơta ờ tơl dà.

Ồng Hà Trung Tướng, Phó Củ tịc Ủy ƀan Ñân zân xã Ea Sar pà git, tờm gơ àl bal mờ tờm jràng gơ dờp ngan mờ trồ tiah, ù tiah lŭ rơđeh bơrlŭ bràs tàm kơnhoàl Ea Kar. Lài do, tàm ală suơn do, làng bol mờng tam ală bơta chi tam lơyah ngai bè tơngời, bùm blàng, khoah… tơl lồ mìng lơh geh bơh 25 tus 30 tơlak đông pah nam. Bơh tŭ tam gơl nàng tam tờm plai jràng, plai gơ àl, tơl lồ cèng wơl priă jền lơh geh uă rlau 10 dơ̆, ndrờm mờ bơh 300 tus 400 tơlak đông pah nam. Ală hìu bơnhă tam gơ àl tàm xã Ea Sar neh brồ guh lơh pas. Xã gam lơh ngan dong làng bol tam tờm gơ àl jat broă lơh kơ̆ kơljap jŏ jòng sùm, lơh gơs mat kă bro gơ àl ai xã in: “Ủy ƀan Ñân zân xã neh lơh Pơrjum hòi jà bơcri priă bè tờm gơ àl, jà ală cơldŭ, mpồl lơh broă mờng chài kơnhoàl dê, Sở Nông nghiệp mờ Phát triển Nông thông pơlam, halà ală cau kă bro blơi nàng jòi geh anih blơi phan lơh gơs làng bol in. Bol hi pơlam làng bol tam gơ àl jat jơnau sồr VietGAP, kờñ dong tờm gơ àl là phan geh dờp OCOP xã in, mờ yal tơnggit gơ àl Ea Sar tàm drà kă bro tàm lơgar mờ bơdìh lơgar”.

Bơh ală suơn mìr ù lŭ rơđeh bơrlŭ mờ bràs ro kơnrañ mìng gơtùi tam ală bơta chi tam lơyah ngai cèng wơl priă jền lơh geh ờ uă bè lài do, rlau 10 nam do, ală hìu bơnhă làng bol lơh broă sa tàm xã Ea Sar mờ ală xã rềp bal bơh kơnhoàl Ea Kar dê neh khin cha tam gơl tam tờm gơ àl ai priă jền lơh geh uă. Tờm gơ àl neh mờ gam ai gŏ gơnoar broă là chi tam tờm ngan tàm kơnhoàl Ea Kar.