Jơh gùt càr Kon Tum tŭ do geh 35 mpồl lơh broă bal, mpồl lơh broă, Mpồl lơh sa kă bro mờ mờr 800 broă lơh anih ròng phan uă bơh cau tàm mpồl cau ling yau dê lơh tờm. Ală broă lơh ròng kơnrồ dra, be dra bơh Mpồl Cau ling yau 2 kơnhoàl Ngọc Hồi mờ Đăk Glei; broă lơh ròng ka ndung kă bro ờ geh bŏ bơh Mpồl Cau ling yau kơnhoàl Sa Thầy; broă lơh tam tờm chi lơh sơnơm bơh Mpồl Cau ling yau kơnhoàl Tu Mơ Rông dê, pa lơh geh cồng nha uă ngan, geh lơh rề ơnàng nàng dong tai gĭt nđờ rơhiang nă cau tàm mpồl cau ling yau in brồ guh lik klàs rƀah.

Kơnờm lơh jat niam srơh “Cau ling yau dong kờl bal mờ gơ̆p tơrmù rƀah, lơh sa jak”, 5 nam do khà hìu bơnhă rƀah tàm mpồl gơmù geh bơh rlau 16% gam 8%.