Jat hơ̆, Thủ tướng Cíñ phủ sồr ală ƀộ, anih lơh broă ndrờm mờ ƀộ, anih lơh broă gơ wèt Cíñ phủ, Ủy ƀan Ñân zân ală càr, ƀòn dờng gơ wèt dà lơgar đơng lam, sồr lơh nền nòn, rơcang lài wil tơl, jơh nùs ală bơta pal geh; yal tơnggit, mblàng yal jơnau pal rơcang lài, di tŭ, tơl làm; ờ gŏ di sền ờ sơp, lơh gơlik bơta niam ngan rlau jơh ai ală cau tus bal pơrlòng in. Ủy ƀan Ñân zân ală càr, ƀòn dờng rơcang wil tơl ală bơta pal geh bè cau lơh broă, phan bơna, ală bơta pal geh ndai nàng bơyai lơh pơrlòng, ngan là ală broă rơndap lơh rơcang lài sơndră mờ bơta trồ tiah ờ niam, bơta gơlik geh nisơna. Lơh gơlik bơta ƀuơn bè lòt rê, sàu sa, ơm rlô ai cau pơrlòng mờ cau tờm pròc mhàm cau pơrlòng dê in tàm ală anih pơrlòng, ngan là cau pơrlòng geh rài kis kal ke, tiah sar lơgar ngài, tiah làng bol jơi bơtiàn dồ êt nă cau, tiah kơh bơnơm, tiah nhàr dà lơgar mờ bồt dà lềng.