Hợp Tác xã Lơh sa suơn sre Nam Yang, kơnhoàl Đăk Đoa, càr Gia Lai geh 150 lồ kơphê. Cồng nha lơh geh nam pa do lơh geh 450 tấn gar. Ồng Nguyễn Tấn Công- Củ tịc Hội đồng Quản trị Hợp ták xã pà gĭt: tŭ giă gơguh tus 100 tơlak đong dùl tấn, làng bol neh tăc di tŭ 80% khà lơh geh. Khà kơphê gam wơl kung gam geh tăc tŭ gŏ giă sơlơ gơmù. Ồng Nguyễn Tấn Công, đơs: “Giă gơguh bơh bồ kàl, den ngan là làng bol dờp geh bơta kwơ. Ngan là cau lơi kung kờñ tăc geh giă 130 rơbô đong dùl kĭ. Mơya ờ tăc geh 130 rơbô đong dùl kĭ den kung tăc geh giă 110 rơbô đong, halà 90 rơbô đong dùl kĭ den kung gam niam ngan sơl. Làng bol kung gĭt ngan ngồn là rơ̆p geh tŭ gơmù wơl, ờ tŭ lơi gơguh sùm ờ. Gơwèt mờ làng bol giă bơh 70 rơbô đong tus 80 rơbô đong dùl kĭ là bơta kơ̆p gơn mờ kơ̆p kờñ ngan rau”.

Tàm tŭ cau tam kơphê neh di tŭ sa lài, den mpồl lơh sa kă bro lơh gơlik kơphê dềt mờ di mơ tàm tiah do den gơtìp wơl bơta kal ke. Ồng Nguyễn Huỳnh Phú Lâm- Kwang atbồ Kông ty Kổ phần kơphê Classic (ƀòn dờng Pleiku, càr Gia Lai) đơs: giă kơphê gơguh uă mờ gơmù uă ngan tàm tơngai lơyah lơh drà kă bro ờ niam ngan. Bulah bè hơ̆, tài bơh bơta bơklơn bơh ală sră pơr gon blơi phan lơh mpồl lơh sa kă bro pal blơi phan bơh lơgar ndai nàng lơh gơlik phan. Bơta do lơh gơbàn uă kal ke bè: priă bơcri phan lơh geh geh tŭ gơguh uă rlau 2 dơ̆ mờ mpồl lơh sa kă bro tam gơl giă jat di mờ drà kă bro. Ồng Nguyễn Huỳnh Phú Lâm, đơs: “Kờñ gàr niam sùm broă lơh gơlik phan sùm, den pal geh ơn prap lài phan. Mờ khà ơn prăp hơ̆ dilah kờñ blơi tŭ giă gơguh, tŭ do gơmù, ờ gơtùi tam gơl mơ ờ. Mờ cau blơi jŏ jòng là pal geh jơnau yal tam gơl, ờ mhar bè giă kơphê tàm drà kă bro dê ờ. Mơya gơwèt mờ cau ngui den pal tam gơl mơ tơn, den cau lơh broă sa rơ̆p gơtìp gơrềng uă ngan”.

Ồng Lương Tiến Việt- cau tờm dùl mpồl lơh sa kă bro kơphê bơkah pơn rơ tàm xã Đăk Tơ Ve, kơnhoàl Chư Păh, càr Gia Lai kờp dŭ lài, kơphê digơlan pơn jat tai gơmù giă tàm tơngai tus. Den tàng, nàng tơrmù ƀà bơta hoàc huơr, mpồl lơh sa kă bro mìng blơi ƀà ơm ƀà lơm: “Ală dơ̆ gơmù giă pơn jat sùm bơh tàm bàr pe ngai tơnơ̆ ngai ơm rlô, mơya khà kơphê den gơguh nisơna. Giă gơguh mờ gơmù jat drà kă bro dê den mpồl lơh sa kă bro kung pal blơi sơl. Mơya, blơi mờ sền gĭt, blơi hời rơ hời, geh rơ wah lơm ờ gŏ di blơi ur ar ờ. Tài bơh drà kă bro tam gơl mhar ngan mờ nisơna ngan”.

Ồng Phạm Văn Binh- Kwang atbồ Sở kông thương càr Gia Lai pà gĭt, kơphê là phan lơh sa suơn sre tờm, pah nam tă pơgồp pơgap 80% priă tăc phan mờ lơgar ndai tàm tiah do dê. Ồng Phạm Văn Binh đơs là, tềng đăp bơta tam gơl bơh drà kă bro dê, mpồl lơh sa kă bro pal geh ală broă lơh tơrmù ƀà hoàc huơr, gàr niam lơh sa, mờ lơh gơlik phan: “Gơwèt mờ mpồl lơh sa kă bro blơi kơphê, lơh gơlik, tăc kơphê mờ lơgar ndai pal gĭt loh jơnau tàm drà kă bro mờ blơi tàm rài tơnơ̆ do rềp ngan. Dơ̆ 2 là, drà kă bro câu Âu là drà dờng bè kơphê, sồr pal geh tơl jơnau sồr uă ngan. Den tàng broă blơi, tam phan pal kờp tus bơta kơ̆ kơl jăp, lơh sa tơlir. Sồr ală gah tơrgùm tàm bơta bơkah niam nàng gàr niam broă tăc phan mờ lơgar ndai. Gơwèt mờ cau lơh broă sa den jơnau bơsram do geh uă rao, giă gơguh den bơcri priă lơh, giă gơmù den hoàc huơr dồ ròt. Den tàng pal tam jat tàm broă rơndăp lơh, rơndăp ù tiah bơtàu tơnguh tờm kơphê dê.