Đơs tàm dơ̆ tìp măt, Củ tịc lơgar ồng Tô Lâm đơs nền tàm ală tŭ, Củ tịc lơgar bơh ală tơngai lơh broă ndrờm neh lơh ngan nàng lơh tơl, lơh geh cồng nha kơnòl broă, gơnoar di jăt mờ jơnau geh ai tàm Sơnoa boh lam dê.

Tàm ală nam do, geh broă sền gròi đơng lam, lam lơh bơh Đảng, Dà lơgar mờ tàm hơ̆ geh bal Củ tịc lơgar, Phó Củ tịc lơgar bơh tàm ală rài, broă pơgồp bal nền nòn, lơh geh cồng nha bơh ală ƀộ, gah lơh broă, mpồl lơh broă dà lơgar mờ ală càr, ƀòn dờng dê bal mờ broă kờñ bal, dong kờl bơh ală làng bol, Cơl dŭ lơh broă Củ tịc lơgar ngai sơlơ bơtàu tơnguh bè ală bơta. Củ tịc lơgar ồng Tô Lâm sồr kwang bàng, cau lơh broă tàm Cơl dŭ lơh broă Củ tịc lơgar pơn jăt tai lơh niam broă lơh jăt kơnòl broă geh jào, gơnoar broă geh ai; mờ kơ̆p kờñ dờp geh ală jơnau pơlam, jơnau đơs pơgồp bal nàng lơh gơs niam kơnòl broă geh Đảng, Dà lơgar mờ làng bol pin dờn jào lơh.