Ồng Hoàng Văn Ga, dùl nă cau lơh broă sa tàm xã Ia Nan, kơnhoàl Đức Cơ, càr Gia Lai tam 2 lồ ù kơphe neh dờng. Ồng Hoàng Văn Ga pà git, trồ prang duh jŏ lơh tờm kơphe ờ pràn tài ờ tơl dà, neh lơh ñui nsộp gơlik pràn. Tàm khà mờr 2 rơbô tờm kơphe tàm suơn, neh geh 600 tờm gơtìp ñui nsồp jồp lơh nha pàl, nsrum plai gơtìp ro rơhời. Ồng Hoàng Văn Ga pà git: “Hìu añ do geh di pơgăp 30% là gơtìp ñui nsộp mờ ờ gơtùi lơh bè lơi do. Ƀồm sơnơm bơh 4 tus 5 dơ̆ bloh, geh bal rào mờ dà tơl tờm kơphe, jơh sơnơm do tus sơnơm ndai mờ kung ờ jơh sơl, lơh aniai tus mờ phan tam uă ngan, mờ tờm lơi neh gơtìp ñui nsộp den di gơlan gơmù bơh 70 tus 100% tơm:.

Tàm kơnhoàl Ia Grai geh rơlao 18 rơbô lồ tam kơphe tàm tơngai gam geh plai. Kòp ñui nsộp neh gơlik tàm uă bă suơn. Ală tiah geh bă ù tam kơphe gơtìp ñui nsộp gơguh uă là ală xã Ia Sao, Ia Hrung, Ia Yok,… Lài mờ hơ̆, tàm nhai 3 nam do, gùt kơnhoàl mìng rơ̆p geh rơlao 200 lồ gơtìp ñui nsộp, tus tŭ do neh rơlao 500 lồ. Jăt jơnau mblàng bơh ồng Đỗ Xuân Hiền, Kwang atbồ Anih tờm Broă lơh drơng ala lơh sa suơn sre kơnhoàl Ia Grai đơs, kòp ñui nsộp gơlik geh tài trồ tơngai duh mờ mìu bồ kàl neh lơh gơlik geh. Nàng rơcang kơrian mờ ală bơta aniai bơh kòp ñui nsộp lơh gơtìp, ală gah, mpồl lơh broă geh gơnoar bơto sồr gơwèt mờ ală cau geh bă suơn gơtìp kòp ñui nsộp lơh gơbàn uă, pal koh sơrbì ală ntê kơphe gơtìp kòp nàng pleh mờ gơtờp tus tờm ndai; ngui ndrờm bal ală broă rơcang kơrian kòp ñui nsộp ai bă suơn gơtìp ờ uă in; kơlôi sơnơng nền nòn lài mờ tŭ rề ơnàng bă ù tam kơphe. Ồng Đỗ Xuân Hiền mblàng tai bè do: “Ñui nsộp tàm tờm kơphe mờ ñui geh uă den bơta tờm là tài trồ tiah prang tơngai duh pơgồp bal mờ ală dơ̆ mìu bồ kàl, trồ tiah duh mờ sùh iò lơh ƀuơn ngan ală bơta ñui đơs bal mờ ñui nsộp đơs is gơlik geh uă”.

Jăt đah Tam phan mờ Sền gàr phan tam càr Gia Lai yal, ñui nsộp là bơta kòp geh uă tàm tờm kơphe, sùm gơlik bơh tŭ tờm lì bơkào tus jơh kàl tơnhào, di gơlan lơh aniai uă ngan tus mờ suơn kơphe dê.

Kờñ dong kờl làng bol lơh broă sa tàm broă rơcang kơrian kòp ñui nsộp, đah Tam phan mờ Sền gàr phan tam càr Gia Lai neh sồr ală kơnhoàl, thị xã, ƀòn dờng, mpồl lơh sa kă bro, đah lơh sa suơn sre-brê bơnơm tam kơphe bơto sồr làng bol lơh jăt ală broă lơh bè lơh kloh suơn tam phan, koh ntê gơtìp tu kòp, cồng, ntê dềt, ntê ờ niam tàm tờm mờ ntê rềp tàm tiah ù nàng suơn kơphe rơha àng niam, tơmù gơtờp bơh ñui. Ồng Trần Xuân Khải, Kwang atbồ đah Tam phan mờ Sền gàr phan tam càr Gia Lai pà git tai: “Tàm tơngai do gah tam phan mờ sền gàr phan tam neh tơnguh broă broă lòt sền suơn tam phan, dong kờl làng bol lơh jăt ndrờm bal ală bơta chài, tàm broă sơnka sền gàr kung bè broă rơcang kơrian kòp ñui nsộp. Gơwèt mờ ală bă suơn gơtìp kòp den làng bol koh sơbì, tơrgùm chu. Gơwèt mờ ală bă suơn gơtìp di mơ den làng bol lơh jăt ală broă lơh ndrờm bal nàng rơcang kơrian”.

Jăt jơnau kờp bơh gah lơh sa suơn sre càr Gia Lai dê, tŭ do tàm càr geh tus rơlao 4 rơbô 800 lồ ù tam kơphe gơtìp kòp ñui nsộp. tàm khà do geh uă bă suơn gơtìp kòp uă, kal ke ngan tàm broă kờñ gơguh pràn wơl tờm kơphe. Kung jăt jơnau bơto sồr bơh ală anih lơh broă sền gàr phan tam, mờ ală nă suơn gơtìp kòp ñui nsộp uă, làng bol pal koh sơrbì ală ntê kòp nàng pleh mờ gơtờp tus ală ntê ndai. Bơta do ờ mìng lơh gơrềng tus cồng nha bơh kàl lơh sa do mờ gam tơnjŏ tus kàl lơh sa tơnơ̆ tai.

Mờ rơlao 105 rơbô lồ, kơphe là phan tam tờm ngan càr Gia Lai dê. Broă ờ tơl dà tuh tài trồ prang jŏ bal mờ uă bă suơn gơtìp kòp ñui nsộp uă geh lơh gơrềng ờ niam uă ngan tus mờ cồng nha bơh bơta phan tam do dê. Den tàng, làng bol pal kơlôi sơnơng nền nòn lài mờ tŭ rề ơnàng ù tam kơphe tơnơ̆ mờ dơ̆ giă kơphe gơguh uă ngan tàm tơngai pa do.