Tơrlah, gơmù, rơdàng là bơta gam gơtìp tàm jơh tềng gơl rơbòng dà tờm đah măt tơngai lik, jòng mờr 10 kơi sồ, lam dà bơh tơnao dà Ea Súp hạ tus xã Ea Bung, kơnhoàl Ea Súp. Geh uă gơl rơbòng lơh mờ bê tông gơtìp tơrlơm gơs ală bơto dờng, jăt gah rơbòng gơtìp dà cò pơrdô tơrlah.

Bi Nguyễn Văn Phú, hìu geh 8 sào ù sre lơh kòi rềp tơn tềng gah rơbòng dà do hờ lồi thôn 5, xã Ea Bung pà git, 2, 3 nam pa do, dà tus ờ ndrờm bal den tàng cồng nha tơnhào kòi gơmù tus rơlao 30%, cau lơh kòi ờ gam geh priă cồng tai. Bi Nguyễn Văn Phú pà git: “Rơbòng dà gơtìp tơrlah hơ̆ sồng gơmŭt dà, den tàng khà dà tus hờ đah lồi thôn 5 ờ tơl. Nàng gơtùi lơh sa den làng bol pal khoàng tơrlung dà, ngui dà bơh tàm ală gơl croh dà ai măi nàng ƀồm tuh kòi sre in. priă tăc tàm broă lơh sa gơguh uă tài phơng sih, ồs đèng gơguh uă, uă làng bol lơh sre gơtìp ờ geh priă cồng”.

Xã Ea Bung, kơnhoàl Ea Súp geh rơlao 1 rơbô lồ ù lơh sre geh tuh dà bơh rơbòng tờm đah măt tơngai lik. Mơya tơnơ̆ mờ git nđờ jơ̆t nam ngui, ờ mìng 10 kơi sồ rơbòng tờm, mờ jơh ală rơbòng dà lòt gan tàm xã do kung neh gơtìp ờ kơl jăp tai uă ngan sơl, lơh broă lơh kòi sre tàm gùt xã gơtìp gơrềng ờ niam. Ồng Lê Hồng Hạnh, Ƀí thư Đảng ủy xã Ea Bung pà git, xã neh dan mờ UɃÑZ càr Dăk lăk tă priă nàng lơh kơl jăp wơl rơbòng dà. Ồng Lê Hồng Hạnh pà git: “Ală rơbòng do ai dà tus tàm bă sre lơyài ngan, geh tŭ uă tiah ờ geh dà hòr, lơh gơrềng ờ niam uă ngan tus mờ cồng nha sih tam. Bol añ neh dan mờ kơ̆p kờñ UɃÑZ càr bơcri priă lơh kơl jăp wơl rơbòng dà nàng lơh bè lơi ai dà tus di tŭ tàm jơh ală bă sre bơh làng bol kis tàm xã do dê, lơh bè lơi cồng nha kàl lơh sa geh uă rơlao”.

Ea Súp là kơnhoàl geh bă ù ơnàng càr Dăk Lăk dê, geh tơnao dơng dà dờng ngan càr Dăk Lăk dê bal mờ rơbòng dà jòng mờr 105 kơi sồ, rơcang tuh tơl 8 rơbô 200 lồ ù tam phan in; Ai dà ngui sa di pơgăp 20 rơbô nă làng bol in. Mơya, jăt ồng Trịnh Quốc Bảo, Phó Kwang atbồ Kông ty TNHH MTV Atbồ Broă lơh bơtơ̆t rơbòng dà càr Dăk Lăk yal, broă lơh rơbòng dà do gam gơtìp ờ kơl jăp uă ngan mờ uă tiah gơtìp tơrlah, gơmù ù, rơdàng. Tàm ală tiah ndai, bê tông kung neh ờ kơl jăp tai mờ gơmŭt dà. Pah nam kông ty geh tă rơlao 1 tơmàn đong nàng dong kờl lơh kơl jăp wơl. Mìng is tàm nam 2023, geh UɃÑZ càr Dăk Lăk dong kờl tai rơlao 10 tơmàn đong bơh Kes priă rơcang kơrian mờ rềs àr bơh trồ tiah lơh aniai càr dê, drơng tàm broă lơh kơl jăp wơl, lơh niam wơl ală tiah gơtìp tơrlah uă… Mơya khà priă do ờ tơl nàng lơh gơs jơh ală rơbòng dà do. Ồng Bảo đơs là, nàng lơh kơl jăp wơl geh cồng nha, pal kờñ geh priă uă rơlao. Ồng Trịnh Quốc Bảo pà git: “Nàng lơh kơl jăp wơl uă, ha là tơmù ờ uă tiah gơtìp tơrlah tàm jơh ală gơl rơbòng dà den pal kơnờm mờ priă dong kờl bơh Dà lơgar, nàng lơh kơl jăp wơl jơh kung pal jơh rơlao 100 tơmàn đong hơ̆ sồng tơl. Priă geh tă bơh priă pơgồp bal lơh bơtơ̆t rơbòng dà, dong kờl rơcang kơrian mờ rềs àr den ờ gơtùi tơl”.

Càr Dăk Lăk tŭ do geh mờr 620 tơnao dơng dà mờ khà dà geh rơlao 650 tơlăk khối; 161 bơtơ̆t dơng dà, 76 anih ƀồm dà mờ bàr gơl bơtơ̆t kơrian lìu dà. Tàm hơ̆ geh uă broă lơh bơtơ̆t neh ờ kơl jăp uă ngan, lơh gơtìp rềs àr tơnao dơng dà, tàm hơ̆ uă ngan là broă lơh drơng tàm broă tuh dà. Uă broă lơh tơnao dơng dà, bơtơ̆t dơng dà, rơbòng dà tàm càr Dăk Lăk gơtìp ờ kơl jăp tai, hoàc huơr tus git nđờ jơ̆t tơmàn đong. Bơh broă sền wơl den tŭ do geh 57 broă lơh di gơlan gơtìp tơrlah uă. Mơya broă lơh kơl jăp wơl gam gơtìp kal ke tài ờ hềt ai geh priă.

Tàm kơnhoàl Ea Súp tus tŭ do, làng bol lơh broă sa neh tơnhào jơh kòi kàl prang, rơcang lơ-òr ù nàng sih tam kàl mìu nam 2024 tai. Mờ bơtơ̆t rơbòng dà ờ hềt geh lơh kơl jăp wơl, den git nđờ rơbô lồ ù lơh sre bơh làng bol kis tàm do dê di gơlan pơn jăt tai gơtìp gơmù cồng nha kàl lơh sa tài ờ tơl dà tuh.