Drim òr (11/01), Sở Nông nghiệp mờ Phát triển Nông thôn càr Dăk Lăk bơyai lơh cri bơyai “Broă lơh jơh tơn kòi tơlir gơmù nhơm ƀơ̆ mờ tơnguh cồng nha” nàng tam gơl broă mờng chài, jòi geh mpồl broă lơh di pal nàng lơh pràn gah lơh sa suơn sre càr dê bơtàu tơnguh kơl jăp, gàr tơl phan sa, phan ngui pơgồp bal mờ broă sền gàr tiah kis niam.

Lơh kòi bơh càr Dăk Lăk tŭ do ơm lài ngan tiah jăt gah dà lềng đah jum tàm gùl lơgar mờ Tây Nguyên dê mờ bă ù sih tam geh di pơgăp rơlao 100 rơbô lồ, geh mờr 35% khà bă ù sih tam pah nam càr dê; cồng nha geh rơlao 69 tạ tàm 1 lồ ù, nam 2023 khà kòi geh di pơgăp 800 rơbô tấn. Càr Dăk Lăk neh lơh ggeh ală tiah lơh kòi phe kă bro, di pal mờ broă kờñ ngui sa tàm lơgar kung bè tăc mờ lơgar bơdìh. Mơya, tàm dơ̆ cri bơyai, ală kwang bàng neh kơlôi sơnơng wơl: lơh kòi phe tŭ do gam tìp uă kal ke, bơta lòng tài tam gơl trồ tiah. Nàng lơh kòi kơl jăp geh bơta bơkah uă, gơmù tơlik nhơm ƀơ̆, pal sền kwơ tàm broă ai lơh ală sơntìl kòi di pal, ngui phơng sih di pal, lơh jăt broă lơh sa suơn sre gơlòt bal, sền gròi rơlao tai tus mờ bơta chài lơh kòi pa.