Tàm trồ mìu bồ nam pa dê, bi Phạm Văn Hát ơm tàm thôn Kim Đôi, xã Ngọc Kỳ, kơnhoàl Tứ Kỳ, càr Hải Dương yal tơnggit bè ƀlàng hìu ơnàng ngan – là tiah ràng tơlik li la ngan măi mok. Mờ mpàng tê chài rơgơi, bồ tơngoh bơceh pa bơh cau lơh phan chài ngan dê, ală nrăng lòs ờ geh hyềng nùs gơ gơs phan bơna drơng tơl bơta jơnau kờñ bè măi ƀồm sơnơm tu, măi plồ gar sen, măi sờr che đèng, măi tuh ƀañ đa… Cau tờm bơh ală bơta măi krơi is do dê mìng sơn đờm mut tàm gah bơceh lơh rlau 10 nam: “Nam 2007 – 2010, añ là cau sơn rờp tàm tiah đah tô dà lơgar lơh wàng dờng tam biap sàng goh, kung kờñ lòt lài coă bồ, mơya he lơh gờñ ir pơndrờm mờ jơnau kờñ den tàng hoàc huơr mờr 4 tơmàn đông. Tơnơ̆ dơ̆ ờ geh cồng nha hơ̆, añ lơh nền lòt lơgar Israel nàng jòi git ñchi bơh tài he ờ lơh geh cồng nha. Lài ngan là geh priă tơm dồs, dơ̆ 2 là sền gơtùi bơsram bơh lơgar ndai ală bơta lơi mờ he ờ hềt git halà ờ”.

Lòt tus lơgar Israel, bi Phạm Văn Hát geh cau tờm wàng dờng jàu lơh broă ơn phơng chi tam in. Trồ tiah tơngai duh bơh ƀlàng bràs Trung Đông dê uă tŭ lơh bi ờ jai: “Gơnru è iar cau pơr tàm hìu măi tŭ ià duh ngan, ñhŭ bè mbar duh. Geh ngai trồ duh tus 49, 50 đồ C, geh ai añ hùc 8 khàr coca, 1 lít mờ nggùl. Glar ir den hòi cau tờm đơs là kờñ mòn măi mok. Añ lài hơ̆ kung là cau chài mòn phan, dơ̆ 3 den lơh tơrlòng gơtùi. Să tờm he ờ gŏ git đơs dà Mỹ, cau tờm rơpua bồ he đơs là same same. Bơh chờm den ờ git same geh pơrya là ñchi, lùp ală cau lơh broă tàm đại sứ quán den bol khi đơs là, cau dơs là khi mờ he jak ndrờm bal”.

Sền gŏ rài lơh sa suơn sre pa ngan lơgar ndai dê, tŭ sơnơng tus lài do, pal ơpah tus 40 nă cau lơh broă mờ ờ git ngui măi mok, kông nghệ, bi Phạm Văn Hát jòi bàn jơnau bơh tài ờ geh cồng nha he dê. Bè hơ̆ den bi lơh nền rê wơl ƀòn tờm mìng tơnơ̆ 1 nam, pờ hìu măi kơ khí mờ khà priă dồs uă ngan gam ơm tềng đap mat. Lời dùl gah jơnau đơs dơ ñŏ tơnhual bè dùl nă cau lơh broă sa bơsram jơh ơdŭ 7, ờ jai tơm dồs, rê hờ ƀòn tờm nàng sơn đờm mut lơh broă, ngai mang lơh mờ măi koh, măi hàn, bi Hát ai ală mờng chài ngan ngồn tàm lŏ sre nàng bơ tơl wơl ală jơnau git wă ờ hềt geh bè ơdŭ bơsram. Dut ndơl den phan sơn rờp tơnơ̆ 2 nam kơlôi sơnơng neh mòn gơs “Robot ơn gar” ờ lơh broă mờ đèng, mờ mìng geh 1 nơm mô-tơ, 1 nơm quạt càl, bơta pràn ngui đèng mìng 200W mơya khà ndang sih gar mhar rlau 2 dơ̆ pơndrờm mờ măi mok ndrờm bal: “Robot ơn gar, mô-tơ mìng dờng kàr bơngàn do lơm gời. Mơya geh ală ngai añ pal lòt Hà Nội 2, 3 dơ̆. Tài dilah blơi ờ gơtùi ngui den mìng geh tàm gơl wơl tàm ngai gời. Đì rơndeh măi añ lòt drà. Gơ mìng dềt kàr do mơya geh giă tus 3 tơlak. Rê crap ờ gơtùi, pal sơrbac mhar lòt tam gơl wơl, mang kung pal lòt tam gơl. Den tàng ngai sơn rờp pơ ùr kung đơs sơl, lơh geh priă kàr lơi den tuh jơh tàm măi ơn gar do. Kung pal kong là dilah ờ gơtùi là pal sang tĕ. Mơya mùl màl tus tŭ do, gơ neh bơ tơl wơl dà kơl hề he neh tă lơh”.

Tơnơ̆ cồng nha phan sơn rờp dê, uă măi lơh broă suơn sre geh mat kă bro Hát mòn gơs dơ̆ dùl dơ̆ geh yal tơnggit. Tàm hơ̆, măi cit sơnơm vaccine iar ada in geh dùl Tập đoàn bơh lơgar Đức dê dan blơi mờ bơta kơp kờñ mòn gơs măi dềt, ƀuơn ngui, giă lơyah rlau mờ măi Đức dê, geh giă tac 35 tơlak đông dùl nơm. Mơya tŭ bi Hát mòn gơs măi ndrờl bè do sơl, mơya giă mìng rlau 1 tơlak đông neh lơh jơh gùt Tập đoàn nrơt, ki ngàm ngan.

Jơnau niam tiơng pơn rơ tus tiah ngài, tŭ do ală phan bi Hát dê neh geh tac tus 15 lơgar tàm dunia mờ 63 càr, ƀòn dờng tàm gùt lơgar. Là cau blơi kwèng bơh anih tac phan dê, ồng Nguyễn Văn Bạo ơm tàm xã Ngọc Kỳ, kơnhoàl Tứ Kỳ, càr Hải Dương yal: Ală măi mok mờ phan lơh broă suơn sre bơh Phạm Văn Hát dê bơceh lơh gơtùi ngui mơ tơn tài go dipal mờ bơta geh ngan broă lơh sa: “Kờñ geh măi mok ƀuơn tàm lơh broă sa den pal tus mờ bi Hát hơ̆ sồng blơi geh. Bơh jơnau bơceh bi dê den bi neh bơceh lơh ngan ngồn niam ngan. Den tàng bol hi sùm lòt ndo nàng blơi”.

Nggùl nhai lài mờ sa tềp, hìu măi bo Hát dê neh ờ dờp tai sră dan blơi pa tài neh uă ir. Tàm sap khoàng, sap hàn nggồr nggàr ờ ơm rlô, bi Phạm Quang Hưng, cau lơh phan bơh hìu măi dê chờ hờp ngan tài cau blơi ngai sơlơ pin dờn rlau: “Bơta kờñ gơboh bơceh lơh phan drơng broă lơh sa suơn sre den bi Hát tam gơl gơ in dipal mờ tơl jơnau kờñ bơh broă lơh sa, bơh cau lơh broă sa dê”.

Triang sền ală “kòn nùs nhơm” he mòn gơs, bi Phạm Văn Hát gam uă jơnau kờp dŭ tàm nam Giáp Thìn. Bơta bơceh lơh, bơta kờñ gơboh ờ git lơh mờ broă bơceh lơh măi lơh broă suơn sre gam dong ală bơta kơp kờñ hơ̆ geh brồ guh rlau tai.