Tơnơ̆ mờ tơngai ngui ală bơta phơng hoá họk, sơnơm sền gàr phan tam ai suơn kơphe in, ồng bèp Hồng (măt tờm là Y Đức Êban) kis tàm ƀòn Sút Mgrư, xã Cư̆ Suê, kơnhoàl Cư̆ Mgar gŏ là, bơta kờñ geh bal mờ bơta hòn gơs niam bơh suơn kơphe là kal ke ngan. Den tàng tŭ kwang bàng bơto pơlam lơh sa suơn sre yal broă lơh ròng ngòñ sràt nàng rơcang sơndră mờ tu, kòp suơn kơphe in, ồng neh dan tus bal. Tơnơ̆ mờ 1 nam lơh jăt, ồng neh gŏ geh cồng nha loh làng ngan bơh broă ròng ngòñ sràt tàm suơn kơphe. “Añ ờ jai ơ̆t mờ sơnơm gơsơ̆t tu, tài lài do tờm kơphe hìu añ ƀồm sơnơm, tàm hơ̆ uă ngan là tu cuh ntê hơ̆ sồng sras tai. Mơya tơnơ̆ mờ tŭ ngòñ sràt tus den bơh tŭ hơ̆, hơ̆ sồng añ gŏ là suơn añ ờ ƀồm sơnơm gơsơ̆t tu tai mờ ntê kơphe gơmù tŭ cuh. Dơ̆ bàr tai là phơng sih kung ờ hoan geh ngui, nam do añ ờ hoan cih phơng”.
Gam gơwèt mờ ồng Đặng Văn Huy kis tàm thôn 3, xã Cư̆ Suê, kơnhoàl Cư̆ Mgar neh đềt mềr, lơh broă bal mờ kơphe hữu kơ, den broă ngui ngòñ sràt nàng rơcang sơndră mờ tu kòp lơh aniai là broă lơh kơl jăp mờ đềt mềr ngan mờ tiah kis. “Pah nam pal ngui sơnơm sền gàr phan tam sùm tàm pơgăp 10 dơ̆ den tŭ do ngui ngòñ sràt neh gơmù gam mìng ngui bơh 2 tus 3 dơ̆ mơ, den gơmù uă ngan priă tă. Tàm hơ̆ uă ngan là tŭ ƀồm sơnơm sền gàr phan tam kung ờ di uă ir sơl. Tàm bơta mìng gam bơh 2 tus 3 kấp mơ, ờ gŏ di tus tàm bơta pal klài sơnơm uă ngan”.
Jăt ồng Huỳnh Văn Tấn, Phó kwang atbồ Cơl dŭ lơh broă bơta chài – Tam jào gơwèt Anih tờm Sền gàr phan tam tiah tàm gùl lơgar đơs: bơta kwơ màng ngan bơh ngòñ sràt dê là gơnoar niam bơh ngòñ do dê tàm broă sền gròi ală bơta phan. Mùl màl neh ai gŏ là ngòñ sràt là phan kơrian geh cồng nha bơh bơta tu lơh aniai, tàm hơ̆ geh tu cuh plai kơphe, ñui mờ sơnde. Bơdìh hơ̆ tai, ngòñ sràt geh git là bơta phan gơdờp uă mờ di gơlan mhar rơcang sơndră mờ ală bơta tam gơl bơh tiah kis dê.
Ală suơn tam phan tàm Tây Nguyên là bơta ƀuơn ngan dong kờl ngòñ sràt in kis mờ bơtàu tơnguh niam. Anih tờm Sền gàr phan tam tiah tàm gùl lơgar geh pơn jăt tai kơlôi sơnơng mờ yal, lơh geh uă ờ mìng tàm suơn kơphe mờ gam geh ală bơta phan tam jŏ tơngai ndai geh bơta kwơ lơh sa uă tàm tơngai tus in. “Tàm Tây Nguyên ală phan tam geh uă priă bơdìh mờ tờm kơphe gam geh tờm sầu riêng tai, nam do bol añ ngui tàm tờm kơphe uă ngan tàm bàr càr Dăk Nông mờ Dăk Lăk. Tus nam tơnơ̆, bol añ geh lơh tàm tờm sầu riêng. Jơnau kờñ là dong kờl làng bol lơh broă sa he dê wă rơlao mờ bơta kwơ bơh ngòñ sràt tàm broă rơcang sơndră mờ tu lơh aniai ờ mìng tàm tờm kơphe mờ gam tàm tờm sầu riêng tai”.
Gơtùi gŏ, ròng ngòñ sràt tàm suơn kơphe gam là dùl broă lơh siñ họk geh cồng nha uă, ờ roh priă mờ kwơ màng là ờ lơh gơtìp ƀơ̆ tàm tiah kis, gơdờp mờ broă lơh sa suơn sre jăt broă lơh kơl jăp. Gah Lơh sa suơn sre càr Dăk Lăk kung gam bơto pơlam làng bol ngui mờ lơh geh uă broă ròng ngòñ sràt nàng rơcang sơndră mờ tu kòp ai phan tam in.
Viết bình luận