Tàm dơ̆ cri bơyai, Ƀộ trưởng Ƀộ Nông nghiệp mờ Phát triển Nông thôn Lê Minh Hoan pà git, lơh sa suơn sre, làng bol lơh broă sa, ƀòn lơgar geh kwang đơng lam Đảng, Dà lơgar mờ Cíñ phủ lơgar Việt Nam ai “là bơta pràn dà lơgar, tiah dong kờl gah lơh sa”.

Tàm hơ̆ lơh kòi phe là gah lơh sa tờm ngan, ờ mìng dong kờl geh tơl phan sa dà lơgar mờ gam dong kờl ai bơta bơtàu tơnguh lơh sa dà lơgar dê kung bè tơlik kơnòl broă bơh lơgar Việt Nam dê tàm boă geh tơl phan sa tàm dunia. Nàng lơh Rơndăp broă bơtàu tơnguh 1 tơlăk lồ sre lơh kòi bơkah mờ tơlik nhơm ƀơ̆ ờ uă, lơgar Việt Nam pal òi jà ală bơta pràn mờ bơta gơguh jăk lơh broă, dùl tàm ală phan kwơ màng là “Mpồl Tam gơl pa bơceh lơh phan sa” tàm lơgar Việt Nam geh lơh jăt jơnau bơceh pa bơh Cri bơyai lơh sa dunia dê, jơnau kờñ pơgồp bal ală mpồl lơh broă tam gơl pa tàm lơgar mờ dunia nàng lơh pràn broă ngui kông nghệ sồ nàng bơtàu tơnguh bơta kwơ lơh sa suơn sre ngăc ngar.