Tơnơ̆ tŭ Ƀộ Nông nghiệp mờ Phát triển Nông thôn cribơyai gơtùi mờ kĭ Nghị địñ thư mờ Tổng kụk sền sơ wì dia phan lik mờ mut tàm lơgar bơh lơgar Lo dê bè broă tac rơ sòn bar bèt Việt Nam tus drà kă bro lơgar Lo, Kông ty Yến sào Thành Dung, kơnhoàl Krông Păk, càr Dăk Lăk neh lơh sră pơ àr tac hờ lơgar ndai rơ sòn sềm bar bèt mờ tus nhai 11 nam 2023, mpồl lơh sa kă bro geh đah Tổng kụk sền sơ wì dia phan lik mờ mut tàm lơgar bơh lơgar Lo dê ring bal. Tàm dơ̆ tac hờ lơgar ndai sơn rờp do, Kông ty tac 300 kĭ rơ sòm bar bèt mờ khà priă 12 tơmàn đông. Jơh gùt càr Dăk Lăk tŭ do geh rlau 1 rbô hìu bơnhă ròng sềm bar bèt, mờ mờr 1 rbô 300 hìu bar bèt.

Broă tac uă hờ lơgar ndai jat sră pơrgon rơ sòn bar bèt sơn rờp bơh càr Dăk Lăk dê geh gơtha kuơmàng ngan, tài Lo là drà kă bro blơi rơ sòn bar bèt uă ngan rlau jơh tàm dunia tŭ do. Tac uă jat sră pơrgon rơp dong mpồl lơh sa kă bro yến sào bơh càr dê geh tŭ niam mut tàm drà kă bro dờng, mờ kung cèng wơl cồng nha lơh sa uă ai cau ròng bar bèt mờ ală mpồl lơh sa kă bro tac hờ lơgar ndai bar bèt in.