Càr Dăk Lăk tŭ do geh rlau 657 rơbô lồ ù lơh sa, tam uă bơta phan tam jŏ nam bè kơphê, kao su, tiêu, điều, tờm chi sa plai. Tàm hơ̆ kơphê geh bă ù mờr 213 rơbô lồ, mờ cồng nha lơh geh rlau 550 rơbô tấn pah nam. Kơphê là phan bơna lơh sa suơn sre tờm, gơrềng tơn tus priă lơh geh bơh uă ngan làng bol tàm càr Dăk Lăk dê. Tàm bơta geh ngan, broă tam uă ir ur ar bè bă ù, ntoăt jat cồng nha lơh geh, sơmờm phơng sih, sơnơm sền gàr phan tam kung bè bơta geh ngan mìng tam tờm kơphê lơm, ngui ù tiah, dà ia ờ di pal pơhìn tus bơtàu tơnguh kơ̆ kơl jăp bơh gah kơphê dê.

Tàm cribơyai, kwang bàng neh đơs cồng nha broă lam lơh ală broă lơh nàng kờñ lơh niam wơl ù tiah brê bơnơm, ngan là gơwèt mờ broă lơh kơphê lơh sa suơn sre brê bơnơm pơgồp bal. Tàm pơgap 5 nam do, broă lơh lơh sa suơn sre brê bơnơm pơgồp bal tŭ lơh tơrlòng lài lam lơh tàm ù tiah càr Dăk Lăk dê neh cèng wơl uă bơta kwơ ai cau lơh broă sa tam kơphê in mờ pơgồp bơnah lơh niam wơl ù tiah tàm ală tiah dê. Gơrềng niam bè bơta mpồl bơtiàn bơh bơta pràn gơ hòi gơ jà cau lơh broă mờ tơnguh uă priă jền ngai lơh broă bơh cau lơh broă dê. Mờ broă lơh kung lơh geh cồng nha gơwèt mờ tiah ơm kis, dong tơrmù jơnau kờñ tuh dà bơh suơn chi dê, gàr niam bơta sùh iò tàm ù, ngan là tàm kàl prang. Tiến sĩ Nguyễn Thị Ngọc Quyên, Khoa Lơh sa suơn sre brê bơnơm, Hìu bơsram Đại học Tây Nguyên pà gĭt: “Gơwèt mờ ală tiah tŭ do gam là ù lơh sa suơn sre mờ làng bol neh tam phan lơh sa suơn sre bơh jŏ den neh ai wơl bă ù hơ̆ ai gah brê bơnơm in nàng tam brê den kal ke ngan tài bơh gơ rềng tus rài kis lơh broă sa bơh làng bol dê gơ jat bal jơh lơm tàm bă ù mờ khi gam tam phan. Den tàng bè hơ̆ gùng dà broă lơh Dà lơgar kung gam lời sơl ai làng bol in tam kơphê tàm ală bă ù brê bơnơm hơ̆ mơya pơn jờng làng bol tam phan lơh sa suơn sre brê bơnơm pơgồp bal, hơ̆ là tam tàm bơrlŭ bơta tờm chi brê bal nàng tơnguh uă bơta chi che mờ di lah đơs geh ngan ngồn bơnah bă ù tàm tiah brê bơnơm hơ̆ bè là brê den làng bol kung geh tă tơm dùl bơnah priă sền gàr brê”.

Kwang bàng kung sơñio là, pal tam gơl bơta gĭt wă bơh làng bol tam phan kơ̆ kơl jăp, sền gròi tus prap gàr lila chi che tàm brê, pơgồp bal mờ broă lơh sa mờ ală broă lơh tă tơm priă sền gàr brê. Kwang bàng đơs pal kơlôi sơnơng broă lơh atbồ, ngui priă tă tơm brê geh bơh broă tam kơphê; lam lơh ală ơdŭ bơto pơlam, pơrjum mblàng yal yơngĭt ală sră nggal geh gơrềng tus adat boh lam nàng kờñ tơnguh uă gơnoar broă, kơnòl broă bơh ală gah geh gơrềng tàm tơngume broă lơh tă tơm priă sền gàr brê. Ồng Trần Hữu Nghị, Kwang atbồ Anih kơlôi sơnơng Brê bơnơm tiah duh sùh iò lơgar Việt Nam đơs là, ală broă lơh geh đơs loh nàng kờñ jơnau kờñ dŭt ndơl là sền gàr geh bă ù lơh sa gam geh tŭ do, tơrmù ƀà ală bơta lơh gơrềng tus brê. Mơkung lơh niam wơl ală bă ù brê bơnơm, lơh sa suơn sre neh klàr ờ gơs, lơh niam wơl ù, sền gàr lơh sa kơ̆ kơl jăp, gơ dờp mờ tam gơl trồ tiah. Ồng Trần Hữu Nghị, đơs:“Gơrềng bơh tam gơl nhơm trồ tiah, ngai sơlơ loh làng, kàl mìu den khà dà mìu uă rlau mờ tàm tơngai lơyah den ƀuơn ngan gơbàn dà kŏ dà cò, kàl prang den jòng rlau den tàng rơ̆p lơh gơbàn ờ tơl dà. Den tàng ală broă lơh do rơ̆p pơgồp bơnah dong kờl ai gơnoar atbồ mờ làng bol ală tiah in, ală cau tam kơphê lơh jat broă sơlơ tơnguh rlau tai lơh sa suơn sre brê bơnơm pơgồp bal nàng tơrmù ƀà bơta gơrềng ờ niam bơh tam  gơl nhơm trồ tiah”.

Jat ală kwang bàng Anih tờm kơlôi sơnơng Brê bơnơm tiah duh sùh iò lơgar Việt Nam tàm tơngai lam lơh lơh sa suơn sre brê bơnơm pơgồp bal gơwèt mờ tờm kơphê tàm ù tiah càr Dăk Lăk neh lơh geh uă cồng nha niam ngan. Pơn yơu bè broă tam gơl tam mìng tờm kơphê lơm tus broă lơh tam uă bơta phan tam, tơnguh bơta pràn tềm pềr dà dùl bă uă ngan. Tàm tơngai tam tàm bơrlŭ bal kơphê mờ ală bơta phan lơh geh bơh lơh sa suơn sre ndai, bơta pràn gơs bơh tam phan dê kung gam geh gàr niam, cau lơh broă sa lơh geh tai priă jền mờ ngan là ù tam phan geh lơh niam wơl niam ngan, tiah ơm kis ù tiah geh sơlơ tam gơl niam...

Anih kơlôi sơnơng Brê bơnơm tiah duh sùh iò lơgar Việt Nam dan anih lơh broă geh gơnoar càr Dăk Lăk pơgồp bal lơh pràn broă tam kơphê tàm broă lơh lơh sa suơn sre brê bơnơm pơgồp bal jat gùng dà kông nghệ kao, lơh sa suơn sre hữu kơ, lơh sa suơn sre sàng goh, tơnguh uă bơta bơkah niam, bơta pràn tàm pơrlòng mờ priă gơguh tai tàm drà kă bro dê.