Tàm pơrjum, neh cih dờp uă jơnau đơs bơh ală mpồl lơh sa kă bro dê, tơrgùm tàm ală tơngume bè: Mờng chài lơh broă cih sră, yal, dờp wơl priă dia; lơh broă bal, lơh nền tă dia priă lơh geh cau dùl nă să is, priă lơh geh mpồl lơh sa kă bro; broă lơh dong kờl dia; broă dong kờl dờp wơl dia ai mpồl lơh sa kă bro phan lơh gơs bơh suơn sre in; sră pơ àr điện tử.

Ồng Bùi Văn Chuẩn, Kwang atbồ Kụk dia càr Dăk Lăk pà git, ală jơnau đơs, jơnau dan bơh ală mpồl lơh sa kă bro dê rơp geh gah dia cih dờp mờ ai tơlik ală broă lơh nàng sơlơ chồl pràn tam gơl wơl sră pơ àr gơnoar atbồ, tơnguh cồng nha atbồ tàm broă lam lơh lùp dồs priă dia, yal, tă dia… ai tơl bơta ai ală mpồl lơh sa kă bro in lơh broă mờ kă bro geh cồng nha.