Sre geh tơl dà, kòi gam hào àr mờ hòn gơs niam tàm “bă sre 132” tàm xã Cư̆ Ea Lang, kơnhoàl Ea Kar, càr Dăk Lăk. Tàm trồ tơngai duh, ào sùh dà kơl hề mơya să ñŏ bơh ồng Sa Moan Krông dê gơlơh chờ sùm tàm ƀlàng sre kòi gam hòn gơs niam. Ồng Sa Moan Krông, kis tàm ƀòn Briu, xã Cư̆ Huê, kơnhoàl Ea Kar pà git, tài ờ tơl ù lơh sa, hìu ồng geh dà lơgar jào pà bă sre tàm ƀlàng sre do bơh nam 2016.

Ờ kờp nam sơnrờp cồng nha tơnhào ờ uă tào ờ hềt git lơh sre, ală nam pơn jăt mờ hơ̆, hìu nhă lơh geh 2 kàl, tơnhào geh 10 tấn kòi pah nam. Kàl prang nam do dờng, sre hìu nhă geh lơh tàm bă ù hờ lồi rơbòng dà, den tàng ồng Sa Moan pal lòt gờñ ngan nàng pơlam dà tus tàm sre. Ồng Sa Moan Krông pà git: “Tàm ƀòn Ea Dơk do, ƀòn Briu geh git nđờ rơhiang hìu geh dà lơgar jào pà ù sre, hìu añ geh pà 3 sào 7 ù sre. Gùng lòt tus tàm sre ngài, den tàng pal lòt còp sre mờ pơlam dà di ngai geh dà”.

Ồng Nguyễn Ngọc Hoà, Củ tịc UɃÑZ xã Cư̆ Elang pà git, bơdìh mờ “bă sre 132” geh lơh jăt Kơrnoăt sồ 132 nam 2003 bơh Thủ tướng Cíñ phủ dê, jào pà ai làng bol jơi bơtiàn ờ gal cau ờ geh ù lơh sa in, tàm kàl prang do, làng bol lơh broă sa tàm xã gam sih 500 lồ kòi sre tàm ală bă sre. Bơh tàm bồ kàl, gơnoar atbồ neh sồr làng bol sih di tŭ, tơmù broă sih kòi tàm ală bă sre ờ tơl dà, den tàng tus tŭ do kung gam pleh mờ trồ prang.

Ồng Nguyễn Ngọc Hoà pà git: “Trồ prang di gơlan gơtìp. Mờ broă tam pà dà bơh Kông ty bơtơ̆t rơbòng dà, xã neh rơcang yal làng bol in, tàm hơ̆ uă ngan là cau geh bă sre lơh kòi rơcang pơgồp bal mờ kông ty bơ̆t rơbòng dà tàm tơngu me geh tơngai yuh dà bơh tơl tiah dê nàng rơcang pơlam dà tus tàm bă sre. Pleh mờ hoàc huơr mờ ờ tus dà tàm ală bă sre ngài”.

Kông ty bơtơ̆t rơbòng dà Dăk Lăk tàm kơnhoàl Ea Kar atbồ 20 broă lơh bơtơ̆t rơbòng dà, tàm hơ̆ geh 18 tơnao dơng dà, 1 bơ̆t mờ 1 anih ƀồm dà. Bă ù geh tơl dà tuh bơh Kông ty dê là 3 rơbô 220 lồ ală bơta phan tam. Tàm hơ̆ geh 1 rơbô 800 lồ phan tam jŏ ngai mờ 1 rơbô 150 lồ ù sre lơh kòi. Ồng Nguyễn Tiến Sỹ, Kwang atbồ Kông ty bơtơ̆t rơbòng dà Dăk Lăk tàm kơnhoàl Ea Kar pà git: tŭ do 14 tơnao dơng dà geh Kông ty atbồ, khà dà gam geh tơl.

Tàm broă lơh bơtơ̆t rơbòng dà Ea Rớt, do là broă lơh bơtơ̆t rơbòng dà dờng ngan tàm kơnhoàl Ea Kar dê, mờ khà dà geh rơlao 18 tơlăk khối. Neh rơlao 1 nhai do, 10 nă kwang bàng, cau lơh broă tàm anih do tam pà bal tơngai lơh broă, til-pờ dà gơmù tàm croh ngai kung bè mang. Ồng Phạm Ngọc Linh, drơng broă tam pà dà Bơtơ̆t rơbòng dà Ea Rớt pà git, dà tàm tơnao tŭ do mìng gam 45% khà dà. Kwang bàng, cau lơh broă tàm anih do pal sùm sền gròi nền nòn broă dờp dà bơh tàm ală rơbòng bơh ală hìu dê, nàng gàr broă ngui dà tềm pềr, geh cồng nha. Ồng Phạm Ngọc Linh pà git: “Tơnao dà kung gam geh tơl dà nàng drơng tus lồi kàl prang do. Jơh ală bơh kwang bàng tus mờ cau lơh broă tàm do geh pơgồp bal mờ gơnoar atbồ kơnhoàl nàng mblàng yal, tam pà dà ngui dà tềm pềr ngan”.

Gam tàm tơngai prang dờng bơh tiah Tây Nguyên dê, trồ prang neh gơlik tàm ờ uă tiah, lơh gơrềng ờ niam tus cồng nha bal mờ khà geh bơh ală bơta phan tam dê. Mơya cau lơh kòi sre tàm kơnhoàl Ea Kar, càr Dăk Lăk neh rơcang geh tơl dà tuh. Kàl lơh kòi sre prang do tàm kơnhoàl kung gam “pleh” prang geh cồng nha.