Nam 2023, phan gar măk ka bơh Kông ty Kổ phần Damaca Nguyên Phương, kơnhoàl Krông Năng, càr Dăk Lăk neh geh tàm jơh ală càr, ƀòn dờng tàm gùt lơgar mờ tăc jăt gùng tờm tus lơgar Nhờk. Mò Nguyễn Thị Thu Phương, Kwang atbồ kông ty pà git, nàng sơrlèt mờ ală kal ke mờ bơta lòng bơh tam gơl lơh sa dê, mpồl lơh sa kă bro neh rơcang geh tơl phan bơh tàm tiah tam, lơh pràn broă tơrbŏ bal, pờ ơnàng drà kă bro.

Nam 2024, bơdìh mờ broă tơnguh uă bơta niam, mpồl lơh sa kă bro pơn jăt tai sền kwơ broă yal phan geh lơh tus mờ ală drà kă bro lơgar bơdìh geh uă bơta pràn. Mò Nguyễn Thị Thu Phương pà git: “Bol añ kung gam lơh broă mờ ờ uă drà kă bro dờng bè lơgar Lo mờ ờ uă lơgar tàm tiah kă bro Ả Rập den kơ̆p gơn tàm tơngai tus geh dờp ală bơta tơngŏ niam geh drà kă bro nàng geh dùl drà kă bro kơl jăp”.

Nam do, bơdìh broă bơtàu tơnguh drà kă bro tàm lơgar, Hợp ták xã Lơh sa suơn sre broă lơh drơng ala Công bằng Ea Tu, xã Ea Tu, ƀòn dờng Buôn Ma Thuột, càr Dăk Lăk pơn jăt tai wèt tus drà kă bro lơgar bơdìh bơh phan kơphe geh bơta niam uă mờ kơphe bơkah. Ồng Trần Đình Trọng, Củ tịc Mpồl duh broă atbồ mờ kung là Kwang atbồ Hợp ták xã pà git, lơh kơphe bơkah neh tơnguh uă bơta kwơ gar kơphe dê, cèng geh bơta kwơ mùl màl tus mờ làng bol lơh broă sa tŭ priă tăc kơphe sùm kơl jăp mờ kas rơlao pơn ndrờm mờ drà kă bro bơh 2 tus 2 tơlăk 500 rơbô đong tàm 1 tấn. Tŭ do, Hợp ták xã Lơh sa suơn sre broă lơh drơng ala Công bằng Ea Tu gam lơh broă rơndăp ù tiah nàng lơh geh uă bơta phan di jăt mờ jơnau kờñ bơh drà kă bro dê, ngai sơlơ tơnguh uă bơta niam phan geh lơh bơh broă lơh kơphe bơkah. Ồng Trần Đình Trọng pà git tai: “Pa do bol añ neh lơh geh mã dăp kơphe gar coh, kơphe ƀòk mờ kơphe klài nàng tăc tus lơgar Lo. Gơwèt mờ kơphe geh bơta niam uă mờ kơphe bơkah ngai sơlơ geh uă cau kờñ, bơta do geh ƀuơn ngan mờ niam ngan gơwèt mờ làng bol lơh broă sa dê. Bol añ kung bơto sồr làng bol lơh broă sa gàr geh broă lơh sa niam, bañ ngui sơnơm sền gàr phan tam uă, bañ ngui sơnơm gơsơ̆t ñhơ̆t den geh kơl jăp”.

Jăt ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr Dăk Lăk yal, nam 2023 là dùl nam geh cồng nha bơh lơh sa suơn sre càr Dăk Lăk dê tŭ khà gơguh lơh sa geh 4,88%. Do là khà gơguh uă ngan tàm ală gah lơh sa càr dê. Bal mờ hơ̆, broă priă tăc bơh ờ uă bơta phan geh lơh bơh suơn sre bè: sầu riêng, kơphe, tiêu, kòi phe gơguh uă mờ càr Dăk Lăk lơh pràn geh broă tăc mờ lơgar ndai jăt gùng tờm tàm ờ uă drà kă bro, den tàng priă geh bơh làng bol lơh broă sa dê kung gơguh sơl, ală cau lơh geh phan kung geh gơguh sơl uă ngan, gơguh 15 rơbô tơmàn đong pơn drờm mờ nam 2022. Priă geh bơh broă tăc phan mờ lơgar bơdìh càr dê kung dơ̆ sơnrờp geh 1 tơmàn 600 tơlăk dolar Mỹ.

Nam 2024, càr Dăk Lăk pơn jăt tai ngui geh bơta pràn tàm broă lơh sa suơn sre, tàm hơ̆ uă ngan là sền kwơ broă pờ ơnàng drà kă bro phan mờ lơgar bơdìh bơh ală bơta phan geh lơh bơh suơn sre tờm dê, càr kơ̆p kờñ geh pơgồp bal tàm broă ai lơh sa mpồl bơtiàn càr dê gơguh. Nàng lơh geh jăt jơnau kơ̆p kờñ do, ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr Dăk Lăk pà git: “Drà kă bro là bơta tờm ngan. Nam 2024, gah lơh broă do geh kơlôi sơnơng 16 kơrnoăt hơ bal kă bro khăt gơboh mờ lơgar Việt Nam neh kĭ mờ ală tiah, ală lơgar nàng ngui ală bơta niam ală bơta pràn bơh ală kơrnoăt hơ bal kă bro khăt gơboh do mờ kơlôi sơnơng ală tiah geh ală jơnau kờñ blơi phan kă bro bơh lơgar Việt Nam dê mờ càr Dăk Lăk geh bơta pràn nàng bơh tŭ hơ̆ ai geh gùng dà broă lơh sa nàng gàr niam di mờ jơnau kờñ bơta niam bơh ală drà kă bro dê nàng bơh tŭ hơ̆ tơnguh uă bơta kwơ mờ tăc phan geh kơl jăp”.