Mờ tơngume “Tơnguh bơta niam phan lơh gơs bơh suơn sre, lơh gơlik- kă bro phan lơh gơs bơh suơn sre phan sa sàng goh, sền gàr tiah ơm kis”, kwang đơng lam bồ càr Dăk Lăk neh dờp geh mờr 100 jơnau lùp bơh làng bol lơh broă sa dê pơyua lùp. 

Tàm pơrjum tìp mat tơm boh bơr, kwang đơng lam bồ càr neh hơ tơn 16 jơnau lùp gơ rềng tus bơtàu tơnguh lơh sa suơn sre tàm càr. Do là nam dơ̆ 2, kwang đơng lam bồ càr Dăk Lăk tìp mat tơm boh bơr mờ làng bol lơh broă sa nàng iat, cih dờp ală jơnau đơs tă pơgồp mờ sền sơ wì, lơh nền, đơng lam ală sở, mpồl, gah broă lơh di tŭ geh broă lơh tă bơsong ală kal ke, kòl yan tàm lơh sa suơn sre bơh càr dê.