Do là jơnau tơnggit geh yal tàm dơ̆ pơrjum lam lơh rơndap broă lơh “Tam kơphe gơ dờp mờ tam gơl nhơm trồ tiah tàm lơgar Việt Nam” bơh Sở Nông nghiệp mờ Phát triển Nông thông càr Dăk Lăk pơgồp bal mờ Mpồl bơtàu tơnguh Hà Lan SNV bơyai lơh tàm mho ngai 06/3. Rơndap broă lơh dong kờl ai càr Dăk Lăk in kờp priă rlau 18 tơmàn đông. Tơngai lam lơh bơh nhai 01/2024 tus nhai 10 nam 2028, tàm ală tiah tam kơphe kal ke bơh càr dê. Jơnau kờñ bơh rơndap broă lơh dê là tơnguh broă lơh sa ai 8 rbô hìu bơnhă lơh broă sa dềt tàm tiah tam kơphe kal ke bè dà ƀồm mờ ờ hềt tus bal tàm broă lơh kơphe tơl khà bơh broă bơto pơlam bè tam kơphe; bơh hơ̆, tơnguh jơnau git wă ngui dipal dà, li la siñ họk, tơrmù khà jơngkah dà sơnơm tàm phan lơh gơs bơh suơn sre, sền gàr pràn kơldang să jan cau lơh broă; tơnguh cồng nha atbồ priă jền hìu bơnhă lơh broă sa jat nùs nhơm tơrmù nhơm ƀơ̆ tuh tơlik, kơ̆ kơljap mờ gơ dờp mờ tam gơl nhơm trồ tiah.