Jăt jơnau yal bơh Ƀộ Tài nguyên mờ Môi trường dê, Jơnau rơcang cih Adăt ù tiah mờ phan kwơ tàm ù lơh gơs adăt boh lam jăt gùng dà tơl bơh Đảng, Dà lơgar dê bè atbồ phan kwơ mờ sền gàr tiah kis, ai geh gùng dà broă lơh jŏ jòng ù tiah, phan kwơ tàm ù mờ lơh sa mờ măi mok lơh phan kwơ tàm ù tus nam 2030, wèt tus nam 2045.

Jơnau đơs pơn dŭt dơ̆ pơrjum, Phó Thủ tướng ồng Trần Hồng Hà sồr: Tàm bơnah lơh tam gơl wơl bơh rơndăp broă lơh Adăt dê, pal đơs tus broă lơh, kă bro, nàng tơnơ̆ mờ hơ̆ geh jơnau cih loh làng kơnòl bơh tơl ƀộ, gah lơh broă dà lơgar dê. Gơwèt mờ jơnau cih bè tă priă pà gơnoar, Phó Thủ tướng jào Ƀộ Tài nguyên mờ Môi trường pơgồp bal mờ Ƀộ Tài cíñ lơh gơs jơnau cih gùng dà broă lơh geh cồng nha, geh kơlôi sơnơng giă bơh drà kă bro dunia nàng geh tơngu me lơh giă lơh phan geh is tàm ù tiah, bơh tŭ hơ̆ tă priă pà gơnoar. Mờ ală bơta phan kwơ màng pal geh sền gròi den Cíñ phủ ai geh jơnau pal jăt mùl màl bè ală bơta geh.