Gùt càr Dăk Lăk tŭ do geh di pơgăp 22 rơbô 500 lồ ù tam tờm sầu riêng, tàm hơ̆ geh mờr 11 rơbô lồ gam geh tơnhào. Tờm sầu riêng geh tam mìng tàm ală kơnhoàl Krông Păc, Krông Năng, Krông Búk, Ea H’ Leo, Cư̆ Mgar, Cư̆ Kuiñ mờ ƀòn dờng Buôn Ma Thuột.

Ồng Vũ Đức Côn, Phó Kwang atbồ Sở Nông nghiệp mờ Phát triển Nông thôn càr Dăk Lăk mờ kung là Củ tịc Mpồl tam klăc Sầu riêng càr Dak Lăk đơs, nam do plai sầu riêng càr dê geh tơnhào uă, cồng nha uă tŭ geh bơh 18 tus 20 tấn plai tàm tơl lồ ù tam. Kờp jơh khà plai sầu riêng tàm kàl lơh sa nam 2023 do geh rơlao 214 rơbô tấn, sơrlèt uă rơlao mờ khà kờp dŭ lài là 195 rơbô tấn tàm bồ kàl. Mờ khà gơguh bơh 55 rơbô tus 75 rơbô tơl kĭ (jăt mờ bơta niam plai), priă geh bơh plai sầu riêng geh uă ngan bơh lài tus tŭ do mờr 15 rơbô tơmàn đong. Tơl lồ ù tam ờ kờp priă tă, cau tam gam geh priă cồng bơh 800 tơlăk tus 1 tơmàn đong.