Hìu gŭ ròng ka bơh ồng Đinh Văn Thắng dê gơ ơm tàm dơlam tàm tiah dà ia brê bơnơm tơlir niam  ngan ơm tàm dơlam tơnau dà Hìu măi đèng dà Dăk R’Tih tàm tiah jat nhàr ƀòn dờng Gia Nghĩa, càr Dăk Nông. Ồng pà gĭt, geh tơnau dơng dà Hìu măi đèng dà sàng goh ngan, gơdờp nàng ròng uă bơta ka, bè: ka chép, ka trắm, ka diêu hồng, ka Koi... Kờp bal pah nam, hìu bơnhă ồng lơh geh priă jền sùm bơh 500 tus 700 tơlak đong bơh tàm 2 hìu gŭ ròng ka dê:“Dà do sàng goh ngan tài bơh do dà lơh Hìu măi đèng dà hiòng hòr niam ngan ờ gŏ geh bơ̆ bơl lơi ờ. Ròng ka den mìng roh tŭ tơngai bơh sơn rờp lơm, den añ pal lơh ngan lơh niam tàm tơngai bơh chờm lơm, lòt gan tơngai pơgap bơh 10 tus 15 ngai, tŭ ka neh kwèng mờ tiah ơm kis den gơ rơ̆p ờ gŏ chơ̆t tai ờ”.

Ngài mờ ƀòn dờng Gia Nghĩa pơgap 100 kơi sồ, tàm dà dờng Krông Nô, bơh uă nam do, hìu bơnhă ồng Bùi Văn Xô, ơm tàm xã Buôn Choáh, kơnhoàl Krông Nô ròng 15 nơm hìu gŭ ròng ka diêu hồng. Ồng pà gĭt, pah nam hìu bơnhă lơh geh pơgap 120 tấn ka, tơnơ̆ tŭ ờ kờp priă tă lơh gam lơh geh priă cồng mờr 400 tơlak đong. Tàm tiah do mat dà ơnàng, hiòng dà hòr di pal nàng lơh uă broă ròng ka, bulah kung gam geh ală bơta kal ke sơl:“Kal ke là kàl mìu dà tih uă den ka ƀuơn ngan gơbàn chơ̆t; dơ̆ bàr là kàl prang den dà soăt ka kung gơbàn chơ̆t sơl. Ròng ka den tŭ do den ờ hoan geh ngan ka sơntìl”.

Càr Dăk Nông kờp jơh bă ù ơnàng mat dà gơtùi ròng mờ tam phan tàm dà pơgap 17 rơbô 500 lồ, mờ dùl ròt tơnau dơng dà Hìu măi đèng dà dờng bè: Buôn Tua Srah, Buôn Kuốp, Đồng Nai 3, Đồng Nai 4, Dăk R’tih, bal mờ 250 nơm bơtơ̆t rbòng dà mờ bàr pe dà dờng, dà croh dờng. Tus tŭ do, bă tiah ròng mờ tam phan tam dà tàm càr dê lơh geh mờr 2 rơbô lồ, mờ pơgap 1 rơbô 200 nơm hìu gŭ ròng ka, khà lơh geh rlau 7 rơbô 300 tấn pah nam. Jat ồng Ngô Xuân Đông, Phó Kwang atbồ Sở Nông nghiệp mờ Phát triển Nông thôn càr Dăk Nông yal, tŭ do gam uă bơta kal ke gơwèt mờ broă ròng uă phan tàm dà tàm càr dê, tài bơh ờ tơl kơrnoat boh lam nàng ròng mờ tam phan tàm dà tàm ală tơnau dơng dà mờ ờ hềt geh ală anih tờm tăc tơl phan sơntìl niam. Gah lơh sa suơn sre gam jòi broă tă bơsong nàng chồl tơnguh ròng mờ tam phan tàm dà jat broă lơh geh cồng nha, kơ̆ kơl jăp, sền gàr tiah ơm kis brê bơnơm, sền gàr ală bơta phan tàm dà geh priă jền uă. Ồng Ngô Xuân Đông, đơs:“Dơ̆ dùl là kờp sền wơl kơrnoat boh lam mờ kơlôi sơnơng ală gùng dà broă lơh, broă dong kờl nàng lơh geh ală bơta niam ƀuơn ƀoài ngan chồl tơnguh broă ròng mờ tam phan tàm dà tàm ală tơnau dơng dà, dà dờng tàm ù tiah càr Dăk Nông bè tàm ală tơnau dà Hìu măi đèng dà halà tàm dà dờng Krông Nô. Dơ̆ 2 là sơlơ tơnguh bơta pơlam tam jàu  bơta chài ròng phan mờ rề ơnàng ală broă lơh ròng mờ tam phan tàm dà geh cồng nha nàng chồl tơnguh bơtàu tơnguh gah phan do dê”.

Mờ uă ngan tơnau dơng dà dờng, tiah dà sàng goh niam, càr Dăk Nông gam uă ù tiah nàng bơtàu tơnguh ròng mờ tam phan tàm dà. Càr ai jơnau kờñ pơnđơl pràn lơh ngan tus nam 2030, kờp jơh bă tiah ròng mờ tam phan tàm dà lơh geh pơgap 4 rơbô 500 lồ, khà lơh geh rlau 20 rơbô tấn.