Kơnờm mờ broă ngui kông nghệ kao tàm broă lơh sa suơn sre, mò Ka Hằng là dùl tàm ală cau lơh broă sa suơn sre tàm thôn Darahoa, xã Hiệp An, kơnhoàl Đức Trọng, càr Lâm Đồng kung gam geh khà priă uă rơlao mờ nam lài. Mò pà git, drà kă bro biăp bơkào tàm nam 2023 geh bơta kă bro ờ pràn, priă tăc ờ kơl jăp mơya kơphe den tăc geh priă. Mờ tàm hơ̆ tai, jơh 3 sào ù tam biăp, bơkào mờ 2 lồ suơn kơphe ndrờm gơguh uă geh bal cồng nha tơnhào mờ bơta niam den tàng hìu nhă neh geh priă mờr nggùl tơmàn đong. Mò Ka Hằng pà git: “Jơh ală oh mi neh git bơsram mờ ngui bơta chài bơh măi mok dê tàm broă lơh sa. Oh mi neh geh uă priă geh bơh suơn kơphe bal mờ broă tam biăp, bơkào. Bơh tŭ hơ̆ geh ờ uă hìu oh mi neh lơh hìu pa, blơi tai măi mok nàng drơng lơh broă sa. Oh mi kung ai ù nàng lơh gùng dă mờ bê tông, dă mờ cài, kơnờm mờ hơ̆ den tàng muh măt ƀòn lơgar ngai sơlơ bơtàu tơnguh mờ wèt tus broă bơ̆t bơtàu xã ƀòn lơgar pa tơnguh uă. Tàm ƀòn mìng gam 7 hìu rơƀah, ndrờm rơƀah 6 hìu, di lah pơn drờm mờ nam 2022 den gơmù uă ngan. Oh mi neh git bơsram bal tàm broă lơh sa. Nam 2023 bŭ lah lơh sa tàm lơgar mờ dunia kung gơrềng uă ngan tus mờ rài kis làng bol, mơya kơnờm mờ broă tam klăc bal dùl nùs đah làng bol mờ gơnoar atbồ xã den tàng rài kis làng bol tàm nam hờm ram, gơboh gơbài rơlao”.

Kung ndrờm bè hơ̆ sơl, bơh broă tam gơl bồ tơngoh kơlôi sơnơng tàm broă tam phan, khin tam gơl phan tam di pal, bal mờ git brồ guh is bơh làng bol dê, làng bol kòn cau K’ Ho kis tàm xã Dà K’Nàng, kơnhoàl Dam Rông neh bơtàu tơnguh pràn ngan rơlao mờ lài do. Jăt ồng K’ Bát, kis tàm thôn Păng Dung, xã Dà K’ Nàng đơs, bơh broă di tŭ tam gơl phan tam tàm dùl bơnah ù tam kơphe neh kra, ai geh cồng nha ờ uă nàng tam tờm jơu ròng tu mờ uă bơta tờm chi sa plai den tàng lơh sa bơh hìu nhă ồng dê neh geh gơguh loh làng ngan. Bơdìh mờ broă tam jơu ròng tu, hìu ồng mờ làng bol kis tàm tiah do gam tam bơrlŭ bal tờm ƀơ, sầu riêng, prìt Laba den tàng nhai lơi kung geh priă. Rài kis lơh sa bơh ƀòn lơgar dê kung jăt mờ hơ̆ gơguh mờ bơtàu tơnguh sùm. Ồng K’ Bát đơs: “Lài do oh mi lơh sa kal ke ngan. Gam tŭ do geh broă sền gròi bơh Đảng, Dà lơgar bè lơh kơphe, tam tờm jơu ròng tu, lơh gùng niam, phan kă bro geh tăc uă den tàng rài kis làng bol tàm ƀòn neh gơguh tơl ngui tơl sa uă rơlao mờ lài ngan. Tŭ do oh mi chờ hờp ngan pơrlòng lơh broă sa, neh git bơsram bal bơta chài bơh măi mok bơh ală tiah ndai dê, geh cau neh git bơkiar tờm kơphe, tam bơrlŭ bal tai biăp, plai màk… bơh tŭ hơ̆ gah lơh sa bal bơh ală oh mi dê neh gơguh uă ngan pơn drờm mờ lài”.

Ờ mìng tơrgùm lơh sa, tơnguh uă bơta phan phan geh lơh di pal mờ jơnau kờñ bơh drà kă bro dê, geh uă tiah jơi bơtiàn kòn cau K’ Ho tàm càr Lâm Đồng gam lơh gơs uă broă lơh sa mờ blơi jơh lài phan geh lơh, ờ mìng dong kờl kơl jăt tàm broă lơh sa jăt gùng dà kơ̆ kơl jăp mờ gam gàr niam priă geh. Đơs pơniơu bè xã Lộc Nam, kơnhoàl Bảo Lâm, làng bol kis tàm do neh ngui geh cồng nha bơta pràn mờ bơta geh bơh xã do dê là bơtàu tơnguh uă bơta phan tam jŏ tơngai geh uă priă tàm broă lơh sa bè ce, kơphe, sầu riêng, măng kụt, măk ka mờ ờ uă bơta tờm chi sa plai ndai, bal mờ tiah lơh sa kơl jăp tus rơlao 5 rơbô lồ ù. Tàm khà do, geh uă broă lơh sa geh bơh 500 tơlăk tus 1 tơmàn đong tàm 1 nam, krơi is ngan geh boă tam tờm sầu riêng geh 2 tơmàn đong tàm 1 nam. Jăt ồng K’ Châu, kis tàm thôn 3, xã Lộc Nam đơs, kơnờm mờ jơnau git wă, git ngui bơta chài bơh măi mok lơh sa dê tàm broă tam phan, sền gàr, drơng broă lơh sa mờ bơ̆t bơtàu rài kis pa, bơta jơgloh rơƀah neh gờñ kơrian lik bơdìh bơh tơl hìu dê. Ồng K’ Châu đơs: “Rài kis bơh oh mi tŭ do neh tam gơl uă ngan bloh. Lài do rơndeh coh kung ờ geh nàng đì, tŭ do hìu lơi kung geh rơndeh Honda, geh hìu blơi rơndeh dờng bơh 5 tus 7 tơhiang tơlăk đong. Hơ̆ sồng hìu mpàn tìm mờ ja lài do kung neh geh lơh mờ hìu sơmang kơl jăp, geh tŭ geh hìu gam lơh hìu cờn, hìu kấp 3. Bơta tam gơl do mìng tàm 2, 3 nam pa do mơ. Kung kơnờm oh mi git tàm broă sền gàr phan tam, phan ròng, tàm hơ̆ uă ngan là tam gơl tam tai ală bơta phan tam ndai tăc geh priă bè tờm ƀơ, sầu riêng… Rài kis bơh oh mi tàm do neh tơl ngui tơl sa, kơl jăp mờ bơtàu tơnguh uă ngan”.

Rài kis lơh sa bơtàu tơnguh, rài kis lơh broă sa mpồl bơtiàn geh gàr niam, bơta lơngăp lơngai cíñ trị mờ mpồl bơtiàn tàm ală xã tiah ngài, tiah làng bol jơi bơtiàn ờ gal cau tàm càr Lâm Đồng sùm geh gàr niam. Làng bol neh ngui niam mpồl tam klăc bal jơi bơtiàn, tus bal bơ̆t bơtàu ƀòn lơgar pa, ƀòn lơgar pas gơs, gơguh jăk.