Ală jơnau cih tă pơgồp jơnau đơs geh sền tàm dơ̆ cribơyai bal mờ gơ̆p yal mờ cribơyai jrô bè ală broă lơh ngan bơh lơgar Việt Nam mờ Mỹ dê tàm broă sơlơ gròi sền broă lơh tơnhàu mờ kă bro dơm chi tìs mờ adăt boh lam; tàm lùp lơh broă rơndăp lơh lơh broă tàm tơngai tus nàng rơhời tơnguh tai lơh broă bal kă bro jrô ơnàng rlau tai bơh broă lơh gơs ală tơngume gơrềng tus adăt boh lam pràn kơldang, ătbồ rềs àr dipal mờ lơh jăt ală broă lơh rơcăng lài kơryan tơnhàu mờ tăc bro dơm chi tìs mờ adăt boh lam. Nam 2023, bă brê lơgar Việt Nam dê geh 14 tơlak 800 rbô lồ, tàm hơ̆ geh 10 tơlak 100 rbô lồ brê geh is mờ 4 tơlak 650 rbô lồ brê tam, mờ khà bă brê geh 42%. Ai dơm chi bơh brê tam, chi tam rah rài tàm lơgar lơh geh pơgăp 80% jơnau kờñ lơh gơlik mờ ngui tàm lơgar mờ tăc tus lơgar ndai.

Geh lơh tàm 04 ngai bơh ngai 04 tus ngai 07/03, bơh ală dơ̆ cribơyai jrô; tìp măt tơm bơh bơr pờ, cribơyai rơ̆p yal tơngĭt mờ yal ală gah geh gơrềng in ală jơnau yal bè ătbồ dơm chi mờ phan bơna dơm chi lơgar Việt Nam, Mỹ mờ Mpồl Tam klăc câu Âu dê, wèt tus jơnau kờñ bơtàu tơnguh gah lơh dơm chi dipal mờ adăt boh lam, kơ̆ kơl jăp tàm rài tơnơ̆ do.