Tàm ƀòn dờng Cần Thơ, drim ngai 03/11, Mpồl kòi phe Việt Nam mờ BizLIVE pơgồp bal bơyai lơh pơrjum pah nam “Broă lơh tơnguh cồng nha ròt bơta kuơ lơh geh bơh kòi phe Việt Nam”. Pơrjum geh lơh tàm tŭ tơngai drà kă bro kòi phe Việt Nam gam lòt gan uă tam gơl. Tàm sùm uă nhai do, giă kòi phe sùm gơguh jơnhua.

Jat kờp dŭ bơh Ƀộ Kông thương dê tàm nhai 10 pa do, tac hờ lơgar ndai phe geh 700 rbô tấn, priă lơh geh 433 tơlak dolar Mỹ. Kờp dŭ 10 nhai nam do dê, Việt Nam tac hờ lơgar ndai mờr 7 tơlak 100 rbô tấn phe, priă lơh geh mờr 4 tơmàn dolar Mỹ, gơguh 17% bè khà mờ gơguh 35% bè priă lơh geh pơndrờm dùl tŭ bal mờ nam lài. Đơs lài, drà kă bro phe tac hờ lơgar ndai tàm nam 2024, tac phe hờ lơgar ndai bơh Việt Nam dê nam do digơlan geh 8 tơlak tấn. Tàm pơrjum, ală cau jak chài mờ ala mat mpồl lơh sa kă bro neh lời uă tŭ jơ nàng cribơyai bè broă lơh măi mok mờ priă bơcri ai gah lơh kòi phe in nàng gơtùi tơnguh priă lơh geh phan bơh suơn sre.