Cribơyai bè ală broă geh gơrềng tus tam gơl broă dong kờl priă nhai, bàr pe jơnau đơs đơs là, jơnau rcang cih adat ờ hềt kờp dŭ jơh ală bơta gơrềng bơh broă tam gơl do dê, pơn yơu bè gơrềng tus broă lơh sang tĕ priă nhai bơh sơnrờp mờ bàr pe jơnau cih geh gơrềng tus Bảo hiểm xã hội. Den tàng, kờñ pal tam gơl jơnau cih bè tam gơl priă nhai lơh bơnàng jă tong Bảo hiểm xã hội sồr pal tong. Bơdìh hơ̆, geh jơnau đơs, jơnau dan, kung pal kơlôi rcang nền nòn broă kờp khà kờp bal priă nhai lơh bơnàng jă nàng tong Bảo hiểm xã hội; Broă priă nhai neh ơm rơlô lơh broă, dong kờl Bảo hiểm xã hội pah nhai gơwèt mờ mpồl ling phàu crong, kwang àng, mpồl ling klàng; broă priă nhai Bảo hiểm xã hội dùl dơ̆ gơwèt mờ cau ờ tong Bảo hiểm xã hội mờ geh jơnau sồr dờp Bảo hiểm xã hội 1 dơ̆ mờ ờ hềt tơl 20 nam tong Bảo hiểm xã hội...

Phó Củ tịc Quôk hội ồng Trần Thanh Mẫn jờng rơ do là rơndăp broă lơh Adat kal ke, gơ rềng uă ngan tus rài kis bơh làng bol dê, kung bè tus ală gùng dà broă lơh bơh Dà lơgar dê, sồr Cíñ phủ pơn jat tai sền sơ wì tơl, tơl làm bơta gơrềng tus mờ tơl tơngume tam gơl, gàr niam jơnau pal jat nàng lơh ngan ngồn ală tơngume, jơnau sồr bơh tam gơl broă lơh Bảo hiểm xã hội dê jat di nùs nhơm bơh Nghị quyết sồ 28 bơh Dà lơgar dê.