Dùl ƀùi mho ring lơngai tàm ƀòn Stơr. Tàm hìu dờng niam ngan, cau ling yau ồng Đinh Yom yal bè rùp wa Hồ mờ cau ling khin cha jak chài ồng Núp geh ơn tềng anih ki ngàm ngan rlau jơh. Ồng kah bè ală nam nhai tam lơh cui rơcai, jat cau ling khin cha jak chài ồng Núp lòt tam lơh mờ bol sò tơm, mờ kơnòl lòt yal jơnau mờ lam gùng, jun kòi phe, gar phàu ai kac màng in. Tàm ală dơ̆ tam lơh cui rơcai hơ̆, să tờm ồng Đinh Yom bềng tềl sồt să, mờ jê nùs rlau mờ uă dơ̆ sền gŏ cau ling bal chơt phi să: “Rài yau, añ lòt jat kac màng bơh nam 1965, lòt tam lơh mờ bol sò tơm Mỹ, añ bal mờ 2, 3 nă cau ndai gơtìp sồt să. Tŭ añ gơtìp sồt să, xã añ dê tŭ hơ̆ là xã Tây Nam yau. Tus nam 1968, añ lơh cau atbồ xã đội, pơn jat tai tam lơh mờ bol sò tơm. Tơnơ̆ tơngklàs nam 1975, añ bal mờ cau ling bal pơn jat tai jòi kup bol Fulro… bal mờ gơnoar atbồ cèng wơl rài kis ring lơngai ai làng bol tàm ƀòn lơgar in”.

Lik bơh mpồl ling nam 1999, rê wơl hờ ƀòn lơgar, ơm kis tàm ƀòn Stơr, ƀòn sùm đềt mềr mờ mat bơh cau ling khin cha jak chài ồng Núp dê, ồng Đinh Yom bal mờ kâp ủy, gơnoar atbồ tàm ƀòn lơgar jơh nùs mblàng yal bè broă lơh bơh Đảng mờ dà lơgar dê, hòi jà làng bol ơm kis mờ lơh broă sa kơ̆ dồ bă tiah, lam lơh rồ tờ lŏ sre, pơlam làng bol ròng phan, tam phan, lơh kòi sre.

Kuơmàng bơh tŭ geh pồ lơh kra ƀòn tàm nam 2000, ồng Đinh Yom sùm kah jơnau nting tơngkah bơh cau ling khin cha jak chài ồng Núp dê là “ờ lời rài kis làng bol dê gơtìp jơgloh rƀah, bơrngơl gơla”, mờ gơnoar broă là cau “gròng sền broă ƀòn”, ồng Đinh Yom neh lơh ngan hòi jà làng bol tam klac bal, bơtàu tơnguh lơh sa, bơt bơtàu ƀòn tờm, sền gròi kòn cau in lòt bơsram… Ală broă lơh bơh ồng Đinh Yom dê neh pơgồp bơnah lơh tam gơl jơnau git wă bơh làng bol ƀòn Stơr dê, geh làng bol pin dờn kờñ gơboh mờ lơh jat, den tàng ală gùng dà, broă lơh bơh Đảng, dà lơgar dê ai tơlik ndrờm geh làng bol lơh jat lơm. Ồng Đinh Yom yal: “Bơh lài tus tŭ do, pah dơ̆ pơrjum làng bol tàm Hìu Rông, añ sùm tơngkah làng bol tàm ƀòn lài ngan pal lơh pơng gàr, sền gàr gùng lòt sàng goh, niam bơnĕ. Hơ̆ sồng bal mờ kwang bàng thôn, xã bè Củ tịc, Ƀí thư, Củ tịc Mặt trận lòt hòi jà làng bol lơh ngan lơh sa nàng tơn jơh jơgloh tơrmù rƀah, tam kòi, tam tơngời, bơt bơtàu rài kis pa”.

Geh cau ling yau, kra ƀòn ồng Đinh Yom jơh nùs mblàng yal, hòi jà, làng bol tiah do neh gơtùi tam gơl bơta sơnơng, broă lơh mờ git ngui ală gơguh jak bơta chài măi mok tàm ròng phan, tam phan…  bal mờ gơp tam klac, pơgồp bal bơta pràn bơt bơtàu ƀòn Stơr gơ gơs ƀòn niam chài kâp càr mờ lơh ngan tơl khà ƀòn lơgar pa tàm nam 2024 do. Bơta tam gơl uă ngan do geh bơta tă pơgồp uă ngan bơh cau ling yau, kra ƀòn ồng Đinh Yom bè jơnau ồng Đinh Bư, Ƀí thư Đảng ủy xã Tơ Tung, kơnhoàl K’Bang, càr Gia Lai dê đơs nền: “Ồng Đinh Yom là cau neh geh tŭ tus bal tam lơh mờ bol sò tơm bal mờ cau ling khin cha jak chài ồng Núp, tus tŭ do neh dờng sơnam, mơya kung gam là cau tàm mpồl jơh nùs ngan bơh Mpồl cau ling yau dê mờ geh tŭ tơngai jŏ jòng lơh kra ƀòn, là cau geh bơngă pin dờn ngan. Ồng sùm là cau lam lài, là krơh niam ngan. Lài do tŭ gam tus bal lơh broă tàm xã, ồng sùm jòi gùng nàng pơlam làng bol tàm ƀòn lơgar bơtàu tơnguh lơh sa hìu bơnhă, bơto sồr kòn sau bơsram sră. Ồng kis lơbơn niam, lơh krơh lài mờ geh kơnòl tai. Tŭ do bulah neh dờng sơnam, să jan ờ sô mơya ồng kung gam kah jơnau ồng Núp tơngkah, pal dong kờl làng bol tàm ƀòn lơgar, bơto sồr kòn sau in git jơnau niam, jơnau di, kơlôi rơcang bơsram sră, bơh hơ̆ làng bol lơh jat mờ gam lơh ngan bơt bơtàu ƀòn Stơr gơ gơs ƀòn Ƀòn lơgar pa”.

Bơh dùl ƀòn gơtìp nai ƀồm bol sò tơm dê aniai, geh bơta sền gròi bơh Đảng, dà lơgar mờ bơta tam klac, lơh ngan sơrlèt gan kal ke bơh làng bol dê, ƀòn tờm cau ling khin cha jak chài ồng Núp bulah ờ hềt pas mơya ồs đèng, gùng lòt, hìu bơsram geh tă priă lơh dờng niam, sàng doh, rài kis nùs nhơm, phan bơna bơtàu tơnguh pràn ngan. Rlau 100 hìu bơnhă làng bol tàm ƀòn tŭ do mìng gam 13 hìu bơnhă rƀah mờ neh tơn jơh hìu ja, hìu sèt, jơh ală hìu bơnhă ndrờm geh rơndeh măi, geh tivi… Rài kis bơtàu tơnguh, bơta pin dờn tàm Đảng, Dà lơgar ngai sơlơ kơ̆ kơljap rlau.