Jat Kông ty Ồs đèng Dăk Lăk, ală nhai bồ nam 2024 jơnau kờñ ngui đèng bơh càr dê gơguh uă rlau mờ ală nam lài. Ngan là, tàm nhai 02 jơnau kờñ ngui gơguh 30% pơndrờm mờ nam 2023. Ală ngai bồ nhai 03 pal pờ tàm khà 510MW mờ rơ̆p lơh geh tus uă ngan tàm khà 550MW tàm ală ngai tus.

Kờp dŭ lài bơta gơlik geh do, bơh bồ kàl prang, Kông ty neh sồr ală gah ồs đèng gơwèt mờ Kông ty jat sền sùm mờ bơsong lơh pơnring di tŭ ală tŭ gùng che ồs đèng ngui kơn jơ̆ ir, trạm biến áp pờ đèng, aptomat hạ thế… nàng lơh broă lơngap lơngai phan bơna măi mok; lòt sền gùng che ồs đèng mờ trạm biến áp, tơnguh dơ̆ đo was bơta duh tàm ală tiah ngui uă, ngan là ală phan bơna ngui đèng uă nàng di tŭ sền gŏ bơta ờ niam mờ bơsong kơryan bơta aniai gơlik geh. Ồng Trần Tấn Phùng, Phó Kwang atbồ Kông ty Ồs đèng Dăk Lăk pà gĭt, mpồl lơh broă kung neh rcang lài ală bơta aniai digơlan gơlik geh tŭ jơnau kờñ ngui đèng gơguh uă nisơna mờ geh broă lơh bơsong geh cồng nha, gàr niam bơta bè ờs gùng che ồs đèng in ai broă lơh sa mờ ngui tàm rài kis.