Tơnơ̆ tơmŭt bal, càr Dăk Lăk geh bă ù ơnàng rlau 18 rơbô 096 kơi sồ vuông, khà kờp làng bol rlau 3 tơlak 300 rơbô nă cau, 102 mpồl lơh broă sră pơ àr gơnoar atbồ kấp sàh; geh tiah nhàr lơgar ù gờl mờ lơgar Campuchia mờ ù tiah dà lềng. Tàm ù tiah bơtàu tơnguh pa mờ tiah kơh bơnơm, dà lềng mờ tiah nhàr lơgar, càr geh tai ù tiah bè broă lơh sa suơn sre, lơh sa măi mok lơh gơlik, logistics, lơh sa dà lềng mờ lơh sa mpồng tiah nhàr lơgar. Mơya, do kung là ù tiah ai tơlik jơnau kờñ uă bè gàr niam sền gàr dà lơgar, lơngăp lơngai.

Tàm dơ̆ lơh broă, ală cau ala mat tơrgùm cribơyai bè broă ngui geh cồng nha bơta ƀuơn bơta pràn pa bơh càr dê mơya pal gơ jat bal niam mờ jơnau sồr gàr niam sền gàr dà lơgar- lơngăp lơngai, ngan là tàm ală ù tiah kwơ màng, tiah nhàr lơgar mờ ală broă lơh bơt bơtàu, gơl gùng lòt rê geh gơtha kwơ màng. Thượng tướng ồng Trần Việt Khoa, Kwang bàng Đảng dà lơgar, Kwang lam bồ Hìu bơsram kơlôi sơnơng Sền gàr dà lơgar, tơngkah càr Dăk Lăk pal ngui niam bơta ƀuơn bơta pràn bè broă lơh sa suơn sre mờ dà lềng nàng tơnguh cồng nha gơguh tai, tàm hơ̆ sền gròi lơh gơlik jrô mờ mpồl cau lơh broă:

“Dăk Lăk tŭ do geh dà lềng jrô mơya mờ ờ geh anih ơhò ơm dà lềng dờng den tàng ngan ngồn kal ke ngan tàm broă lơh anih ơhò ơm dà lềng mờ logistics; dơ̆ 2 là ù tiah bazan geh uă bơta pràn ngan rlau jơh tàm dunia, uă bơta plai chi kwơ bơh broă lơh sa suơn sre dê mơya ờ geh wơl lơh gơlik jrô. Bơh hơ̆ bol he gŏ bàr pe broă, tŭ do lơh bè lơi càr Dăk Lăk in bơtàu tơnguh geh broă lơh sa suơn sre, pal bơtàu tơnguh lơh gơlik jrô hơ̆ sồng bơsong geh broă gơguh tai lơh sa bè broă lơh sa suơn sre”.

Dùl tơngume geh đơs sùm tàm dơ̆ lơh broă là bơtàu tơnguh lơh sa pal lòt bal mờ bơt bơtàu tiah rcang gàr lài mờ lơh kơ̆ kơl jăp “nùs nhơm rcang gàr lài làng bol dê”. Jat hơ̆, tơnguh uă rài kis, tơrmù rƀah, gàr niam rài kis mpồl bơtiàn, lơh geh broă lơh kơ̆ kơl jăp ai làng bol in, ngan là tàm tiah nhàr lơgar mờ tiah làng bol jơi bơtiàn dồ ết nă cau, ờ mìng là kơnòl broă bơtàu tơnguh lơm mờ gam pơgồp bơnah gàr kơ̆ kơl jăp bơh tàm ƀòn lơgar. Gơwèt mờ ală ù tiah kwơ màng, broă bơcri priă lơh gùng lòt rê, lơgistics, bơtàu tơnguh lơh sa mpồng tiah nhàr lơgar, tàm tơrbŏ bal mờ lơgar Campuchia mờ ù tiah wèt tus dà lềng kung geh ơn tàm jơnau sồr gàr niam sền gàr dà lơgar- lơngăp lơngai. Bal mờ hơ̆ là tơnguh uă bơta pràn jak kờp dŭ lài, rcang gàr lài sền gàr làng bol, drơng mờ trồ tiah lơh aniai, rềs àr mờ ală bơta pơhìn ờ hềt geh bơh lài tus tŭ do. Ồng Lương Nguyễn Minh Triết, Kwang bàng Đảng dà lơgar, Bí thư Tỉñ ủy càr Dăk Lăk đơs nền:

“Bol he sền gĭt pơgồp rơndăp ù tiah lơh sa- mpồl bơtiàn mờ rơndăp ù tiah  rcang gàr lài sền gàr dà lơgar lơngăp lơngai bơh sơn rờp ngan là gơwèt mờ ală rơndăp broă lơh dờng, ală gơl gùng lòt rê kwơ màng, ală ù tiah kwơ màng mờ sùm  bơsram lơh jat nùs nhơm là bơtàu tơnguh nàng kơ̆ kơl jăp mờ kơ̆ kơl jăp nàng bơtàu tơnguh. Dơ̆ 2 là bol añ tơrgùm pơn jat tai bơt bơtàu nùs nhơm rcang gàr lài sền gàr dà lơgar gùt làng bol pơgồp bal mờ nùs nhơm rcang gàr lài sền gàr lơngăp lơngai làng bol mờ nùs nhơm rcang gàr lài nùs nhơm làng bol dê, is ồn sền gròi tus tiah nhàr lơgar, tiah làng bol jơi bơtiàn dồ ết nă cau mờ ală ù tiah geh tiah kwơ màng”.

Bơh tiah kơh bơnơm tus tiah dà lềng, bơh ală ƀòn lơgar tiah sar lơngài tus tiah nhàr lơgar, Dăk Lăk sùm ai jơnau kờñ bơtàu tơnguh kơ̆ kơl jăp pơgồp bal mờ dùl Tây Nguyên ring lơngai.