Tàm kơnhoàl Cư̆ Kuiñ, Mpồl Cữ thập đỏ càr Dăk Lăk pa bơyai lơh Drà ràng tơlik phan Satềp kờñ gơgoh nam 2024. Broă lơh do neh jào pà 33 pò phan mờ 300 pang sră lòt drà o đong, kờp jơh khà priă geh rơlao 233 tơlăk đong ai làng bol geh rài kis gơtìp kal ke tàm kơnhoàl Cư̆ Kuiñ in. Ală bơta phan 0 đong geh mbar, bañ kèo, phan ngui sa bè dà tơngi, dà màn, dà mơji, sơdàng, ƀòk lơngồt, ƀung mi, phe. Tàm broă lơh do gam geh ală broă lơh ndai bè siăt sŏ ờ sa priă, cih thư pháp; hìu klơm mbar; hìu kŭp rùp lời kir mờ tus bal ală broă nhơl ờs mờng. geh dờp phan Satềp bơh broă lơh do, bi Y Gu Buôn Yă, kis tàm ƀòn Ea Mtá, xã Ea Bhok, kơnhoàl Cư̆ Kuiñ yal: “Añ chờ hờp ngan, ưn ngài ală cau geh nùs nhơm niam neh bơyai lơh dùl broă lơh geh kwơ màng mờ chờ hờp ngan ai ală cau geh rài kis gơtìp kal ke bè bol añ dê, geh dong kờl bol añ geh dùl satềp hờm ram rơlao, chờ hờp rơlao”.

Jăt mò A Yun H’ Hương, Củ tịc Mpồl Cữ thập đỏ càr Dăk Lăk đơs, broă lơh drà ràng tơlik phan satềp kờñ gơboh nam 2024 geh jào pà 25 rơbô pò phan, kờp jơh khà priă geh 17 tơmàn 500 tơlăk đong ai làng bol geh rài kis gơtìp kal ke tàm gùt càr in. Bơdìh mờ 3 broă lơh tơrlòng tàm ală kơnhoàl Cư̆ Kuiñ, Cư̆ Mgar mờ Ea Kar geh Mpồl Cữ thập đỏ pơgồp bal mờ gơnoar atbồ kơnhoàl bơyai lơh, ală tiah gam tai geh rơwah is gùng dà broă lơh di pal mờ bơta geh bơh tơl tiah dê. “Bơh Drà ràng tơlik Satềp kờñ gơboh do, ưn ngài ngan ală cau neh dong kờl, ală cau geh nùs nhơm niam neh dong kờl broă lơh do, kung kơ̆p kờñ tàm tơngai tus ală cau dong kờl mờ ală cau geh nùs nhơm niam geh pơn jăt tai lơh broă bal mờ Mpồl Cữ thập đỏ nàng lơh ală broă lơh rài kis lơh broă sa mpồl bơtiàn ngai sơlơ niam rơlao, pơgồp bal tàm broă dong kờl làng bol geh dùl satềp chờ hờp, hờm ram mờ gơboh gơbài”.

UɃÑZ càr Dăk Lăk pa ai geh broă rơndăp lơh nàng tă priă còp să mờ pà phan ală mpồl lơh broă, ală cau tàm dơ̆ satềp Giáp Thìn nam 2024 in. Jăt mờ hơ̆, càr Dăk Lăk geh lơh ngan ai kờp jơh priă còp să mờ pà phan ală mpồl lơh broă, cau dùl nă să in di tàm Satềp Giáp Thìn nam 2024 là rơlao 77 tơmàn đong.

Di tàm dơ̆ do, kwang đơng lam càr Dăk Lăk geh bơyai lơh ai ală mpồl kwang bàng tus còp, pà 51 pò phan ai cau geh màng mờ dà lơgar pơnrơ jăk bal mờ ờ uă Anih lơh broă drơng broă làng bol, Kwang àng, Mpồl ling sền gàr tiah nhàr dà lơgar mờ Ling klàng tàm càr in. Bal mờ hơ̆, Ủy ƀan Mặt trận Dà lơgar Việt Nam càr, Mpồl Cữ thập đỏ càr Dăk Lăk kung ai geh broă rơndăp lơh nàng lam sồr tă geh ală priă nàng tus còp, pà phan ai ală hìu rơƀah, hìu nhă geh rài kis gơtìp kal ke mờ ală cau geh sră dong kờl bơh dà lơgar … tàm tiah ngài, tiah làng bol jơi bơtiàn ờ gal cau in nàng ală làng bol ndrờm geh wă rò satềp chờ hờp mờ hờm ram.

Broă gàr niam cau lơi kung geh Satềp mờ “Ờ lời geh cau lơi gơtìp sơbì is hờ tơnơ̆” gam geh Ƀộ Lao động Thương ƀin mờ Xã hội bal mờ ală kấp, ală gah lơh broă, ală càr, ƀòn dờng sền gròi mờ lơh jăt. Ồng Phạm Hồng Đào, Phó Kwang atbồ Cơl dŭ lơh broă Dà lơgar bè tơmù rơƀah gơwèt Ƀộ Lao động Thương ƀin mờ Xã hội đơs: “Gơnoar atbồ ală càr, ƀòn dờng kung bè ală cau geh nùs nhơm niam mờ ală anih lơh broă gơrềng bal kung geh ală broă lơh, hòi jà geh ală broă tă priă ndai nàng geh dong kờl, gàr niam nàng ală làng bol in wă rò satềp chờ hờp, niam bè jơnau đơn glam bơh Ƀan Ƀí thư, Cíñ phủ mờ Thủ tướng Cíñ phủ dê. Mìng dong kờl phe, bè ờs lồi nam mờng geh dong kờl. Bơdìh hơ̆ tai kung geh phan bơh Củ tịc lơgar, phan bơh ală càr, ƀòn dờng. Bơta do jăt mờ bơta geh bơh kes priă tơl càr, ƀòn dờng dê, geh lơh ngan tàm bơta geh nàng gàr niam ngan ai làng bol kis tàm tiah geh atbồ. Ƀộ Lao động Thương ƀiñ mờ Xã hội kung neh geh sră nggal pơyoa tus ală tiah in sơl, sồr sền gròi, đơng lam drơng gàr Satềp ai cau rơƀah in di mờ kơrnoăt geh ai. Bơdìh hơ̆ tai, ală tiah geh kơnòl sền gròi, jăt sền broă lơh jăt broă do nàng gàr niam di cau lơi geh dờp, bañ lời gơlik geh bơta sơgràm lơh geh kwơ să tờm bơh broă do”.

Satềp Giáp Thìn gam mờr tus. Drơng satềp ai cau rơƀah in, cau geh bơta ờ pràn tàm mpồl bơtiàn, gàr niam broă nàng cau lơi kung geh wă rò satềp chờ hờp, hờm ram neh gơs bơhiàn niam bơnĕ bơh jơi bơtiàn dà lơgar Việt Nam dê.