Pa do, mò Trương Thị Mai, Kwang geh jơng tàm Ƀộ Cíñ trị, Duh broă sùm Ƀan Ƀí thư, Kwang atbồ Mpồl Rơndăp broă Dà lơgar mờ mpồl kwang bàng neh tus còp, pà phan satềp ai kông ñân, cau lơh broă tàm Tiah lơh sa mờ măi mok Phú Hội, kơnhoàl Đức Trọng, càr Lâm Đồng in. Tàm dơ̆ tus còp, mò Trương Thị Mai neh đơs niam gơnoar broă mờ lơh ngan sơrlèt kal ke bơh mpồl kwang bàng, kông ñân, cau lơh broă tàm tiah lơh sa mờ măi mok Phú Hội tàm lơh broă, lơh gơs phan geh lơh bơh suơn sre. Pơgồp bal tàm broă lơh gơguh priă gah phan lơh sa suơn sre càr dê đơs is, gùt lơgar đơs bal geh uă ngan tàm 10 nam do. Biăp, kơnuh, plai chi tàm càr Lâm Đồng tŭ do neh geh tăc tus tàm drà uă lơgar tàm dunia.

Mờ mò Trương Thị Mai kung sồr ală tiah lơh sa mờ măi mok, gơnoar atbồ càr Lâm Đồng pơn jăt tai sền gròi, dong kờl, drơng gàr rài kis ai cau lơh broă tàm ală tiah lơh sa mờ măi mok in, tàm hơ̆ uă ngan là mhar lơh gơs ală rơndăp broă lơh hìu ơm mpồl bơtiàn cau kông ñân in. Di tàm dơ̆ do, mò Trương Thị Mai neh jào pà phan satềp ai tiah lơh sa mờ măi mok Phú Hội in; jào pà 200 pò phan ai kông ñân, cau lơh broă tàm tiah lơh sa mờ măi mok, tơl pò phan geh 1 tơlăk 300 rơbô đong.

Tàm ƀòn dờng Kon Tum, Phó Thủ tướng Cíñ phủ Trần Hồng Hà bal mờ Mpồl kwang bàng lơh broă bơh Dà lơgar neh tus Broă lơh “Satềp tơrgùm bal-Nam pa tam pà bal” geh Liên đoàn Lao động mờ Ủy ƀan Mặt trận dà lơgar Việt Nam càr Kon Tum bơyai lơh. Đơs tàm Broă lơh “Satềp tơrgùm bal-Nam pa tam pà bal” ai kông ñân lơh broă mờ hìu làng bol gơtìp kal ke tàm càr Kon Tum in, Phó Thủ tướng Cíñ phủ Trần Hồng Hà pơyoa jơnau còp să bơh Tổng Ƀí thư Nguyễn Phú Trọng dê; ală kwang bàng đơng lam Đảng, Dà lơgar mờ nùs nhơm đềt mềr bơh să tờm dê tus mờ ală kwang bàng, làng bol mờ jơnau chờ gờm nam pa niam bơnĕ ngan. Kơ̆p kờñ ală cau, ală hìu geh dùl satềp hờm ram, chờ hờp, dùl nam pa pràn kơl dang mờ gơguh jăk. Phó Thủ tướng pơn jờng càr Kon Tum neh drơng gàr ai ală kông ñân mờ hìu làng bol gơtìp kal ke di tàm Nam pa satềp tus. Mờ sồr càr pơn jăt tai sền gròi nàng ală cau geh rài kis gơtìp kal ke brồ guh lik klàs mờ rơƀah kơl jăp: Phó Thủ tướng Trần Hồng Hà đơs tai: “Ală kấp ủy, gơnoar atbồ càr Kon Tum pơn jăt tai sền gròi, geh ală broă dong kờl hìu rơƀah, hìu ndrờm mờ rơƀah mờ gàr niam là lik klàs mờ rơƀah kơl jăp. Tơnguh jơnau git wă, ngăc ngar lơh sa, ai geh tai broă lơh, rài kis lơh broă sa cau rơƀah, cau ndrờm mờ rơƀah in nàng brồ guh tàm rài kis. Sền geh bă ù bơtàu tơnguh lơh hìu ơm mpồl bơtiàn, tàp pràn să jan, ală bơta geh kwơ ai kông ñân tàm ală tiah lơh sa mờ măi mok. Tơnguh broă bơyai lơh, lơh uă cồng nha lơh broă bơh Liên đoàn Lao động dê”.

Jơnau yal bè lơh sa mpồl bơtiàn dà lơgar dê, Phó Thủ tướng Cíñ phủ Trần Hồng Hà đơs nền Dà lơgar neh sơrlèt nam 2023 bềng lìu bơta kal ke mờ gơguh lơh sa rơlao 5,05%, gơwèt mpồl gơguh lơh sa uă tàm tiah do mờ tàm dunia. Ngui gơnoar niam chài ờs mờng dong kờl bơh jơi bơtiàn dê bal mờ bơta niam chài niam bơnĕ ngan bơh rài Đảng mờ Dà lơgar he dê sùm sền gròi tus mờ rài kis Làng bol, tus broă tơn jơh jơgloh tơmù rơƀah, sền do là jơnau sồr jal mhar, là kơnòl broă tờm, jŏ jòng bơh broă bơtàu tơnguh mhar, kơl jăp dà lơgar dê. Di tàm dơ̆ do, Phó Thủ tướng Cíñ phủ Trần Hồng Hà bal mờ kwang đơng lam càr Kon Tum neh pà phan Satềp ai 200 nă kông ñân lơh broă mờ 50 hìu làng bol gơtìp kal ke mờ tơl pò phan geh 1 tơlăk 300 rơbô đong.

Lài mờ hơ̆, Phó Củ tịc lơgar Võ Thị Ánh Xuân bal mờ mpồl kwang bàng lơh broă bơh Dà lơgar neh tus còp, pà phan hìu nhă geh sră dong kờl bơh dà lơgar, kông ñân geh rài kis gơtìp kal ke tàm kơnhoàl Vũ Thư, càr Thái Bình in. Tus còp, pơn dờm, pà phan kông ñân geh rài kis gơtìp kal ke tàm Kông ty Kổ phần Quốk tế Bảo Hưng, Phó Củ tịc lơgar Võ Thị Ánh Xuân neh tam pà bal, nam 2023 tềng đăp mờ broă đơng lam bơh Đảng, broă lơh ngan bơh ală mpồl lơh broă cíñ trị bal mờ broă pơgồp bal bơh ală làng bol, mpồl lơh sa kă bro dê, dà lơgar neh lơh geh ală cồng nha kwơ màng tàm jơh ală gah broă. Đơs tờm, Đảng, Dà lơgar sùm sền gròi, drơng gàr, tơnguh uă rài kis phan bơna, nùs nhơm ai làng bol in, tàm hơ̆ geh kông ñân lơh broă. Phó Củ tịc lơgar đơs niam càr Thái Bình nam pa do neh lơh geh ală cồng nha pơnrơ ngan tàm broă bơtàu tơnguh lơh sa mpồl bơtiàn; đơs tờm tàm cồng nha geh bal hơ̆, geh broă pơgồp bal pràn bơh mpồl kông ñân tàm ală mpồl lơh sa kă bro tàm càr dê đơs bal mờ bơh Kông ty Kổ phần Quốk tế Bảo Hưng đơs is. Phó Củ tịc lơgar sồr càr Thái Bình sền kwơ broă drơng gàr satềp ai làng bol in, tàm hơ̆ uă ngan là sền wơl ală hìu rơƀah, kông ñân lơh broă geh rài kis gơtìp kal ke nàng rơcang dong kờl, bañ lời cau lơi gơtìp sơbì is hờ tơnơ̆.