Bòn Kret Krot, xã Hra, kơnhoàl Mang Yang neh geh rlau mờ nggùl hìu bơnhă làng bol lòt tìs gùng tìs dà jat Yàng ờ ngan Hà Mòn, lơh roh lơngăp lơngai rơndăp tăp sèng. Ală nam do, bal mờ broă tam dră wơl, sang tĕ Yàng ờ ngan, gơnoar atbồ tiah do neh hời rơ hời bơt bơtàu, tơmut đảng viên pa, bơt bơtàu ală anih lơh broă cíñ trị. Bơh tiah ờ geh đảng viên, tŭ do, ƀòn neh geh 9 nă đảng viên. Đảng ủy xã Hra jàu kơnòl broă ai tơl nă đảng viên tàm ƀòn in drơng broă dùl mpồl hìu bơnhă. Jat hơ̆, đảng viên lơh krơh tàm broă bơtàu tơnguh lơh sa, bơt bơtàu rài kis niam chài tàm tiah làng bol ơm kis, lơh jat niam ală gùng dà broă lơh bơh đảng mờ Dà lơgar dê, jơh nùs hòi jà, mblàng yal, bơto pơlam ală hìu bơnhă in lơh jat bal.

Bơh hơ̆ sền gŏ, lơh geh ală bơta bơto bơtê, lơh geh uă mpồl làng bol jak chài gơ gơs đảng viên pa. Bi Sin- đảng viên ƀòn Kret Krot, xã Hra pà gĭt: “Đảng viên lơh jat niam gùng dà broă lơh bơh Đảng mờ Dà lơgar dê. Neh là dùl nă đảng viên lơh krơh niam, lơh krơh tàm ƀòn lài, lơh bơta lơi kung pal di, nàng làng bol tàm ƀòn in sền mờ lơh jat”.

Jơh gùt xã Hra, kơnhoàl Mang Yang tŭ do geh rlau 2 rơbô hìu bơnhă làng bol, 63% khà kờp làng bol là jơi bơtiàn dồ ết nă cau. Jơh gùt xã geh 15 Ci ƀộ, 177 nă đảng viên. Tàm hơ̆, geh 3 ƀòn tờm bè lơngăp lơngai cíñ trị ndrờm neh lơh sir bè mpồl cau, rơndăp tăp sèng kấp ủy. Rlau nggùl khà cau lơh broă ờ drơng broă sùm tàm ală thôn, ƀòn neh là đảng viên. Xã pơnđơl pràn lơh ngan tus nam 2025 khà do lơh geh 80%. Mpồl đảng, đảng viên geh bơt bơtaù, bơtàu tơnguh là anih kơl dìng ai bơta kơ̆ kơl jăp, pràn kơl dang tàm tiah làng bol ơm kis dê. Mò Nguyễn Thị Huệ- Phó Củ tịc Hội đồng Ñân zân xã Hra, pà gĭt:“Tơnơ̆ tŭ geh jàu kơnòl broă bơh Đảng ủy dê den añ là Đảng ủy viên bè drơng broă ƀòn in den añ kung pơnđơl pràn lơh ngan, jơh nùs lơh jơh bơta pràn he dê. Dơ̆ 1 là bè bơto pơlam ai Ci ƀộ in broă lơh pơrjum Ci ƀộ lơh jat di mờ Jơnau pơlam sồ 12 bơh Mpồl rơndăp broă Dà lơgar dê mờ Jơnau pơlam sồ 03 bơh Mpồl rơndăp broă Huyện ủy kơnhoàl Mang Yang dê; kung dong kờl ai Ci ƀộ in tàm broă lơh đơng lam, sồr lơh ai Ci ƀộ in lơh jat ală kơnòl broă tàm ală tiah in; dong đảng viên tàm Ci ƀộ in gĭt wă he rơ̆p geh tă pơgồp gơnoar broă dờng gơwèt mờ ù tiah do dê”.

 Kơ̆ kơl jăp lơngăp lơngai cíñ trị, rài kis bơh làng bol dê sùm geh bơtàu tơnguh. Nam 2023, priă lơh geh kờp bal tơl nă cau tàm xã lơh geh rlau 40 tơlak đong, khà hìu bơnhă rƀah gơmù gam 13,6%, kờp bal tơl nam gơmù bơh 5 tus 7%. Ồng Đinh Văn Tâm - Phó Ƀí thư Đảng uỷ xã Hra, kơnhoàl Mang Yang, pà gĭt: “Tàm tơngai pa do den bol añ kung neh lơh geh ală bơta mờ pơn jat tai bơto pơlam pơrjum Ci ƀộ in ală tơngume geh gàr tơl, den bol añ ai dùl nă kwang bàng là kông cứk in bè at gơnoar broă Phó Ƀí thư Ci ƀộ, bal mờ Ci ƀộ lơh tơngume tờm. Pơyơu bè là bơt bơtàu mờ sơlơ tơmut uă đảng viên den broă lơh tơn jơh jơgloh tơrmù rƀah, broă lơh tam dră wơl mờ yàng ờ ngan Hà Mòn”.

Ală anih lơh broă cíñ trị hời rơ hời geh bơtàu tơnguh bè cồng nha, bơta gơtùi lơh broă, pơgồp bơnah gàr niam lơngăp lơngai cíñ trị, tam gơl tơl ală bơta tàm rài kis làng bol ală jơi bơtiàn tàm xã Hra dê.